Almaty qalasynda Qazaqstan Respýblikasy Prezidentiniń halyqaralyq yntymaqtastyq jónindegi arnaýly ókili Erjan Qazyhan men Eýropa Odaǵynyń adam quqyqtary jónindegi arnaýly ókili Imon Gilmordyń teń tóraǵalyǵymen «Jarqyn bolashaqqa jol: indetten keiingi turaqty qalypqa kelý» taqyrybynda «Eýropalyq Odaq – Ortalyq Aziia» azamattyq forýmy ótti. Bul týraly Aqordanyń baspasóz qyzmeti habarlady.
Is-shara Almaty qalasy ákimdiginiń qoldaýymen aralas formatta EO men OA-nyń 300-den astam ókiliniń qatysýymen ótti. Forýmnyń biregei formaty sarapshylardy, quqyq qorǵaýshylar men BAQ ókilderin bir alańǵa jinaýǵa múmkindik berdi jáne Ortalyq Aziia elderi, sonymen qatar Ortalyq Aziia men Eýropalyq Odaq arasynda ashyq talqylaýdyń bolýyna yqpal etti.
Jiyndy ashqan Erjan Qazyhan forým Qazaqstan Táýelsizdiginiń 30 jyldyǵy aiasynda, elimizdiń saiasi jáne ekonomikalyq úderisteriniń qarqyndy jańǵyrýy kezeńinde ótip jatqanyn atap ótti. Qazaqstan uzaq joldan ótip, aitarlyqtai nátijelerge qol jetkizdi jáne óz institýttaryn jetildirý jumystaryn jalǵastyrýda.
Arnaýly ókildiń aitýynsha, Qazaqstan Prezidenti Qasym-Jomart Toqaev memlekettiń óz azamattaryn tyńdaýyna jáne olardyń ótinishterine jaýap berýine kepildik beretin aýqymdy ekonomikalyq jáne saiasi reformalardy bastady. Osy baǵytta Memleket basshysy azamattyq qoǵamǵa erekshe nazar aýdarýda jáne onyń odan ári damýy jaqynda qabyldanǵan Azamattyq qoǵamdy damytý tujyrymdamasy aiasynda belgilengen. Tujyrymdamanyń negizgi maqsaty – Úkimettiń qyzmeti men sheshimderine qoǵamdyq baqylaý tetikterin kúsheitý úshin jaǵdai jasaý. Kezeń-kezeńmen saiasi jańǵyrý Memleket basshysynyń qyrkúiek aiyndaǵy Qazaqstan halqyna Joldaýynda basty basymdyq retinde naqtylandy. Bul basymdyq sailaý úderisterin jaqsartýǵa, qoǵam men bilik arasyndaǵy dialogqa, áielderge, jastarǵa, múmkindigi shekteýli adamdarǵa jáne dini bostandyqqa múmkindik berý mehanizmderine baǵyttalǵan.
Mundai ishki saiasi kún tártibi COVID-19 indeti, klimattyq daǵdarys jáne Aýǵanstandaǵy kúrdeli gýmanitarlyq ahýal siiaqty úsh jahandyq syn-qater aiasynda júzege asyrylýda. Bul máselelerdi sheshý úshin álemdik qoǵamdastyq, onyń ishinde Ortalyq Aziia men Eýropalyq Odaqqa múshe elder úilesimdi jumys isteýi qajet. Eýropalyq Odaq – aimaq elderi men Qazaqstannyń senimdi seriktesi. Qazaqstan men EO arasyndaǵy ózara senimge, syilastyqqa jáne ortaq qundylyqtarǵa negizdelgen qarym-qatynastar nyǵaiyp keledi. Osylaisha, Qazaqstan men EO arasyndaǵy taýar ainalymy shamamen 24 milliard dollardy qurady. 2005 jyldan beri EO elderi Qazaqstan ekonomikasyna 160 milliard dollarǵa jýyq investitsiia saldy.
Keńeitilgen seriktestik týraly kelisimniń jasalýy – Eýropalyq Odaqpen birlesken jumystyń mańyzdy nátijesi. Bul qujat byltyr kúshine endi. Atalǵan Kelisim sheńberindegi jumystar ekonomika, qaýipsizdik, EO elderi men Qazaqstandaǵy saiasi damý siiaqty úsh baǵytty qamtidy. Prezidenttiń arnaýly ókili Qazaqstan eýropalyq seriktesteriniń atalǵan baǵyttardaǵy kúsh-jigerin, sondai-aq forýmda anyqtalǵan Ortalyq Aziiadaǵy yntymaqtastyqtyń kún tártibin qoldaitynyn aitty.
