Foto: Polisia.kz
Almaty politsiiasy esirtki satýshylardyń qylmystyq tobyn joidy, - dep habarlaidy "Ult aqparat" Polisia.kz saityna silteme jasap.
Esirtki qylmysyna qarsy kúres bólimi málimetinshe, politsiia arnaiy jasaqtarynyń kómegimen júrgizilgen is-shara barysynda bes er adam ustalǵan. Olardyń bári de - Jambyl oblysy, Shý aýdanynyń turǵyndary.
"Kúdiktiler qalanyń ár jerinde ustaldy. Máselen, Qalqaman shaǵynaýdanynda 46 jastaǵy A. esimdi er adam quryqtaldy. Ruqsat etilgen tintý kezinde odan syǵymdalǵan gashish zaty salynǵan tórt býma, 1 million 150 myń teńge kólemindegi qolma-qol aqsha jáne IIO zeinetkeriniń jalǵan kýáligi tabyldy jáne tárkilendi. Al kúdiktiniń úiinen, úidiń qazandyǵynan jalpy salmaǵy 4 keliden asatyn gashish esirtki zaty salynǵan 7 polietilen býmasy men metall tarazylar tabyldy. Dál sondai jalǵan qujat toptyń taǵy bir múshesinen – 40 jastaǵy O. esimdi er adamnan tárkilendi. Arnaiy is-shara nátijesinde zańsyz ainalymnan jalpy salmaǵy 34 kelige jýyq gashish tárkilendi. Kúdiktiler qamaýǵa alyndy", – dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
Politseilerdiń aitýynsha, Almatyǵa esirtki jetkizý arnasy anyqtaldy.
Qazirgi ýaqytta shópti áleýetti paidalanýshylardyń aýqymy tekserilip jatyr. Almaty qalalyq Politsiia departamenti QR QPK-niń 201-babynyń talaptaryna, sondai-aq QR Konstitýtsiiasynyń normalaryna sáikes, qylmystyq is boiynsha ózge de málimetter jariialanbaitynyn habarlady.
