Almaty ákimi Baýyrjan Baibek jumys sapary kezinde ál-Farabi dańǵylynyń ońtústigine qarai ornalasqan Esentai ózeni arnalaryn bekitý jumysynyń qarqynyn tekserdi, dep habarlaidy "Ult aqparat" qalalyq ákimdiktiń baspasóz qyzmetine silteme jasap.
Óitkeni, jazda ózen jaǵalaýyndaǵy trotýarlardy, sport alańdaryn abattandyrý jáne jaryq jelilerin júrgizý bastalady. 4000 aǵash otyrǵyzý josparlanǵan.
Qazirgi kezde 1,8 shaqyrymǵa sozylǵan aýmaqqa tirek qabyrǵalaryn ornatý, ózen túbine temirbeton tóseý jáne tehnikalyq joldardy abattandyrý jumystarynyń 65 paiyzy oryndaldy. Atqarylǵan sharalar ýchaskede sý aýqymyn kúndelikti ótkizý qýatyn 10 ese arttyrady.
Jobany iske asyrý barysynda «Tokyo Rope Almaty» zaýytynda shyǵarylatyn otandyq ónimder qoldanylyp jatyr. Óndirýshi álemdik joǵary sapaly standartqa sai aýyr gabiondarǵa 50 jyldan astam kepildik berip otyr.
Megapolis basshysy seldiń aldyn alý jumystaryna erekshe nazar aýdarylatynyn atap ótti. Sońǵy úsh jyl ishinde sel qaýpi bar ýchaskeler 67-den 12-ge qysqardy, toǵyz ózenniń arnalary rekonstrýktsiialandy jáne 300 shaqyrym aryq jelisi qaita jasaldy.
Budan ózge, Almatyda «Aqsai» jáne «Aiýsai» jańa sý bógetterin salý josparlanǵan. «Myńjylqy» sý bógetin rekonstrýktsiialaý aiaqtalyp qaldy. Ermensai, Kereńqulaq, Úlken jáne Kishi Qarasý siiaqty tórt ózenniń arnalary bekitilip, abattandyrylyp jatyr.
Qarǵaly ózeniniń boiyndaǵy uzyndyǵy 7,7 shaqyrym bolatyn aýmaq bekitilip, abattandyrylýda. GES 1 - ÚAK men Medeý-Shymbulaq betkeilerindegi qaýipti ýchaskelerge qorǵanys qondyrǵylary ornatylyp, bekitilgen.
