Foto: avatars.dzeninfra.ru
Almatyda er adam úsh kisi jabylyp zorlaǵanyn málimdedi. Bul týraly qoǵam belsendisi, Nemolchi qorynyń prezidenti Dina Tańsári aitty, - dep habarlaidy Massaget.kz portaly.
Dina Tańsári bul jaǵdai týraly Instagram-paraqshasynda jazdy. Onyń sózinshe, túngi birlerde jábirlenýshi er adam NeMolchiKZ qoryna habarlasqan. Er adam politsiiaǵa aryz jazyp úlgermegen. Birden qorǵa habarlasyp, ne isteý keregin surap, keńes almaq bolǵan.
"Biz mundai jaǵdaidy "Alyp júrý" dep ataimyz. Iaǵni jábirlenýshiler bizge politsiiaǵa deiin habarlasady, biz zardap shekkendermen sóilesip, organdarǵa habarlasyp, advokat, psiholog izdep kómektesemiz. Túnde Áýezov aýdany Politsiia departamentiniń basshysy Ulan Ábilhaiyrdy oiatýyma týra keldi. Birden jaýap bergenine alǵys aitamyn. Qazir tergeý amaldary júrip jatyr. Túnde nebári eki saǵat uiyqtadyq. Biraq tańerteń jábirlenýshi er adam kúdiktiler jazasyn alýy úshin kúresetinine nietti ekenine qýandym.
Ázirge jaǵdai qalai bolǵany belgisiz. Biraq bul qylmysty dástúrli emes jynystyq baǵdary bar adamdarǵa degen jekkórýshilik negizinde tapsyrys bergen adamdar jasaǵany. Áldekimge onyń seksýaldyq baǵdary basqa bolyp kóringen shyǵar, sondyqtan gomofobtar kek almaq bolǵan shyǵar. Ne úshin gomofobtardyń áreketi dep oilaimyz? Sebebi olar jábirlenýshige Shariǵat zańdary boiynsha ómir súrý keregin, ol musylmandardy uiatqa qaldyrǵanyn aitqan", - dep jazdy Dina Tańsári.
Jábirlenýshi er adam qarsylasýǵa tyrysqan, biraq úsh adam bir er adamǵa qarsy shyqqan. Onyń sózinshe, ózin Jandos dep tanystyrǵan er adam ony aldyn ala úiine shaqyrǵan. Biraq páterde odan bólek taǵy eki adam bolǵan. Olar zorlaitynyn aityp, 500 myń teńge talap etken, artynsha tóbeles bastalyp ketken. Jalǵyz qalǵan jábirlenýshiniń olarǵa shamasy jetpegen.
"Bul jait birneshe saǵatqa sozylǵan. Zorlyqshylardyń áreketi tańǵaldyrmai qoimaidy, sońynda olar jábirlenýshini óltiretinderin aitqan. Meniń oiymsha, jappai zorlaýda buryn mundai qylmysty birneshe ret istegen qylmyskerler bolady", - deidi qoǵam belsendisi.
