Almatyda koronavirýs juqtyrǵan naýqastardyń sany ósýde. Bul týraly Almaty qalasynyń sanitarlyq-epidemiologiialyq baqylaý departamenti málim etti, dep habarlaidy "Ult aqparat".
Qalada sanitarlyq-epidemiologiialyq ahýal JRVI men tumaýdyń maýsymdyq ýshyǵýy saldarynan kúrdelene túsýde. Ótken jyldyń osy kezeńimen salystyrǵanda jedel respiratorlyq virýstyq infektsiiany juqtyrǵan naýqastar sany 2,2 esege ósken.
Halyqtyń barlyq jastaǵy toptarynyń KVI aýrýyna shaldyǵý deńgeiiniń artýy erekshe alańdaýshylyq týǵyzýda. 22 qazannan bastap naýqastar sany kóbeigen. Tek sońǵy táýlikte turǵyndar arasynda KVI juqtyrǵandardyń 77 oqiǵasy tirkelgen.
Adamdar kóp shoǵyrlanǵan oryndarda KVI juqtyrý saldarynan qoǵamda epidemiialyq protsesster órshýde. Júrgizilgen epidemiologiialyq saraptamalar nátijesinde infektsiianyń 53%-y qoǵamdyq kólikte, 23%-y úi jaǵdaiynda, 17%-y qoǵamdyq oryndarda juǵatyndyǵy anyqtaldy.
Sondyqtan Almatynyń sanitarlyq-epidemiologiialyq qyzmeti qala turǵyndaryna profilaktikalyq sharalardy saqtaýdy usynady. Birinshiden, adamdar kóp jinalatyn oryndardan, ásirese 65-ten asqan adamdardyń aýlaq bolǵany jón. Ekinshiden, maska taǵyp, qoǵamdyq oryndarda, dúkenderde, dárihanalarda jáne taǵy da basqa jerlerde áleýmettik araqashyqtyqty saqtaý qajet.
«JRVI belgileri baiqalsa úiden shyqpai, dárigerdi úige shaqyrý kerek. Ózińizdi ózińiz emdemeńiz, balalardy jáne egde jastaǵy otbasy múshelerin jeke bólmede oqshaýlap, janashyr bolyńyz», – delingen ákimdik taratqan habarlamada.
