Foto: Pexels.com
Ortalyq kommýnikatsiialar qyzmeti alańynda ótken brifingte Almaty qalasynyń ákimi Darhan Satybaldy 2025 jyldyń qańtar–qarasha ailaryndaǵy áleýmettik-ekonomikalyq damý qorytyndylaryn tanystyrdy. Ákimniń aitýynsha, qalanyń basty basymdyǵy – ekonomikanyń turaqty ósimin qamtamasyz etý, dep habarlaidy Ult.kz.
Biyl Almatyda iskerlik belsendilik joǵary deńgeide saqtalyp, investitsiialyq serpin oń baǵytta damydy. 11 aidyń qorytyndysy boiynsha qysqamerzimdi ekonomikalyq indikator 11,4%-dy qurap, ótken jyldyń sáikes kezeńinen asyp tústi. Ekonomikalyq ósimge qurylys salasy (+38,3%), kólik (+21,5%) jáne óńdeý ónerkásibi (+16,8%) negizgi úles qosty.
Investitsiialyq belsendilik te aitarlyqtai artty. Qala ekonomikasyna 11 aida 1,9 trln teńge investitsiia tartylyp, bul ótken jylmen salystyrǵanda 19%-ǵa kóp. Jalpy quny shamamen 500 mlrd teńgeni quraityn 12 iri joba iske qosyldy. Olardyń qatarynda avtokólik shyǵarý, shinalardy qaita óńdeý, shyny ydys jáne kún modýlderin óndirý zaýyttary bar.
Jyl qorytyndysy boiynsha Almatynyń jalpy óńirlik óniminiń ósimi 6,4% deńgeiinde bolady dep kútilýde. Al 11 aida qala biýdjetine túsken salyq kólemi 1,97 trln teńgege jetip, 19,4%-ǵa artqan.
Turǵyndardyń ál-aýqatyn arttyrý baǵytynda da oń ózgerister baiqalady. Jyl basynan beri 92 myń jańa jumys orny ashylyp, onyń 87%-y turaqty jumys oryndary boldy. Toǵyz aidyń qorytyndysy boiynsha ortasha ailyq jalaqy 539 myń teńgege jetip, 14,5%-ǵa ósti. Bul kórsetkish respýblikalyq ortasha deńgeiden 29%-ǵa joǵary.
