Ekologiialyq kórsetkishterdiń onlain kartasy megopolis turǵyndaryna qorshaǵan ortanyń jaǵdaiy men atmosferalyq aýanyń sapasy týraly keń maǵlumat beredi, dep habarlaidy "Ult aqparat".
Joba Almaty ekologiialyq jaǵdaiy jónindegi barlyq málimetterdi biriktiretin dinamikalyq platforma. Monitoringtik stansalar árbir 20 minýt saiyn onlain rejiminde aýanyń jaǵdaiyn aqparatty júiege berip otyrady. Mundaǵy kórsetkishter sandyq derekter túrinde beriledi. Shekti ruqsat etilgen kontsentratsiia indikatorlarynyń dinamikasy da kórsetiledi.
Stansalar atmosferadaǵy lastaýshy zattardyń kólemin, sondai-aq ylǵaldylyq, temperatýra, qysym, jeldiń baǵyty men jyldamdyǵyn ólsheidi.
Almaty ákimi B. Saǵyntaevtyń tapsyrmasymen júzege asyrylǵan jobanyń maqsaty – qarapaiym azamattarǵa, sarapshylar men mamandarǵa onlain formatta aqparat usyný.Sonymen qatar, jinaqtalǵan kórsetkishter boiynsha aýa sapasynyń jáne basqa parametrlerdiń ózgerýin boljaýǵa múmkindik beretin málimetter bazasy qurylady.
Eske salaiyq, qalada aýa sapasyna monitoring júrgizetin 10 stantsiia bar. LED-ekrandarǵa aqparattardy shyǵarý jáne málimetter bazasyna kórsetkishterdi berý úshin onlain monitoringtiń taǵy 10 datchigi iske qosylyp, jumys barynsha sapaly júrgiziletin bolady.
