Almaty qalasy ákimdiginiń Telegram arnasyndaǵy málimet boiynsha, Almatyda 23-24 sáýir kúnderi barlyǵy 78 adamnan koronavirýs tabylǵan. Olardyń 38-i - meditsina qyzmetkeri.
"22-si - ortalyq qalalyq klinikalyq aýrýhanasynyń karantinde bolǵan qyzmetkeri, ekeýi - N1 qalalyq klinikalyq aýrýhanasynyń provizorlyq statsionarynyń qyzmetkeri, 10 qyzmetker balalar qalalyq infektsiialyq aýrýhanasynda isteidi, tórteýi - jedel meditsinalyq kómek qyzmetiniń ókili" delingen resmi habarlamada.
Qalǵan 40 adam koronavirýs juqqan adamdarmen aralasqan.
Almaty - koronavirýs juqtyrǵandar men virýs juqqan dárigerler sany jaǵynan respýblikada alda tur. Qalada jalpy 764 adamnan koronavirýs tabylǵan. Naýqastar arasynda Almatydaǵy ortalyq qalalyq klinikalyq aýrýhanasynyń meditsina qyzmetkerleri kóp. 18 sáýirde qalanyń bas sanitar dárigeri aýysty.
Qalalyq densaýlyq saqtaý basqarmasynyń jetekshiligine burynǵy densaýlyq saqtaý vitse-ministri Kamaljan Nadyrov keledi dep habarlanǵan edi. Izinshe odan koronavirýs anyqtalyp, basqarma jetekshisi Tileýhan Ábildaev ornynda qaldy.
Qazir infektsiialyq statsionarlarda 663 naýqas (Almaty oblysynan kelgen bir naýqasty qosa eseptegende) emdelip jatyr.
"Eki adamnyń jaǵdaiy - óte aýyr, 24 adamnyń jaǵdaiy - aýyr. 198 naýqastyń hali - ortasha aýyr. Qalǵandarynyń jaǵdaiy birqalypty" delingen habarlamada.
Respýblika boiynsha 22 adam virýstan qaitys bolǵan. 24 sáýirde tańerteń Almatyda koronavirýstan jetinshi naýqastyń qaitys bolǵany belgili boldy. Naýqas 1957 jyly týǵan.
