الماتى قالاسى ەكٸمدٸگٸنٸڭ Telegram ارناسىنداعى مەلٸمەت بويىنشا, الماتىدا 23-24 سەۋٸر كٷندەرٸ بارلىعى 78 ادامنان كوروناۆيرۋس تابىلعان. ولاردىڭ 38-ٸ - مەديتسينا قىزمەتكەرٸ.
"22-سٸ - ورتالىق قالالىق كلينيكالىق اۋرۋحاناسىنىڭ كارانتيندە بولعان قىزمەتكەرٸ, ەكەۋٸ - N1 قالالىق كلينيكالىق اۋرۋحاناسىنىڭ پروۆيزورلىق ستاتسيونارىنىڭ قىزمەتكەرٸ, 10 قىزمەتكەر بالالار قالالىق ينفەكتسييالىق اۋرۋحاناسىندا ٸستەيدٸ, تٶرتەۋٸ - جەدەل مەديتسينالىق كٶمەك قىزمەتٸنٸڭ ٶكٸلٸ" دەلٸنگەن رەسمي حابارلامادا.
قالعان 40 ادام كوروناۆيرۋس جۇققان ادامدارمەن ارالاسقان.
الماتى - كوروناۆيرۋس جۇقتىرعاندار مەن ۆيرۋس جۇققان دەرٸگەرلەر سانى جاعىنان رەسپۋبليكادا الدا تۇر. قالادا جالپى 764 ادامنان كوروناۆيرۋس تابىلعان. ناۋقاستار اراسىندا الماتىداعى ورتالىق قالالىق كلينيكالىق اۋرۋحاناسىنىڭ مەديتسينا قىزمەتكەرلەرٸ كٶپ. 18 سەۋٸردە قالانىڭ باس سانيتار دەرٸگەرٸ اۋىستى.
قالالىق دەنساۋلىق ساقتاۋ باسقارماسىنىڭ جەتەكشٸلٸگٸنە بۇرىنعى دەنساۋلىق ساقتاۋ ۆيتسە-مينيسترٸ كامالجان نادىروۆ كەلەدٸ دەپ حابارلانعان ەدٸ. ٸزٸنشە ودان كوروناۆيرۋس انىقتالىپ, باسقارما جەتەكشٸسٸ تٸلەۋحان ەبٸلداەۆ ورنىندا قالدى.
قازٸر ينفەكتسييالىق ستاتسيونارلاردا 663 ناۋقاس (الماتى وبلىسىنان كەلگەن بٸر ناۋقاستى قوسا ەسەپتەگەندە) ەمدەلٸپ جاتىر.
"ەكٸ ادامنىڭ جاعدايى - ٶتە اۋىر, 24 ادامنىڭ جاعدايى - اۋىر. 198 ناۋقاستىڭ حالٸ - ورتاشا اۋىر. قالعاندارىنىڭ جاعدايى بٸرقالىپتى" دەلٸنگەن حابارلامادا.
رەسپۋبليكا بويىنشا 22 ادام ۆيرۋستان قايتىس بولعان. 24 سەۋٸردە تاڭەرتەڭ الماتىدا كوروناۆيرۋستان جەتٸنشٸ ناۋقاستىڭ قايتىس بولعانى بەلگٸلٸ بولدى. ناۋقاس 1957 جىلى تۋعان.
