QR IIM tergeý departamentiniń bastyǵy Sanjar Ádilov qańtar oqiǵasy kezinde urlanǵan qarýdy tabýdyń jańa derekterin aityp berdi, dep habarlaidy QazAqparat.
«Respýblika kóleminde qańtar oqiǵalaryn tergeýge ishki ister organdarynyń 500-den asa qyzmetkeri tartyldy. Olardyń arasynda tergeýshiler, jedel qyzmetkerler jáne kriminalister qamtyldy. Ishki ister ministrligi ortalyq apparatynan jergilikti jerlerge tájiribeli qyzmetkerler jiberildi. Birqatar qyzmetkerler arnaiy prokýrorlar jetekshilik etetin vedomstvoaralyq jedel tergeý toptarynyń quramdaryna qosyldy jáne olarmen birge jappai tártipsizdikterdiń uiymdastyrýshylaryn anyqtaý boiynsha jumysty jalǵastyryp jatyr», - dedi S. Ádilov Ortalyq kommýnikatsiialar qyzmetinde.
Sonymen qatar ol urlanǵan qarýdy izdeý jáne tárkileý boiynsha jedel-izdestirý is-sharalary júrip jatqanyn aitty. Búgingi kúni tárkilengen qarýdyń jalpy sany 1 006-ny jáne oq-dári 20 307-ni qurady.
«Mysaly, jedel is-sharalar kezinde Almaty qalasy Shańyraq-2 shaǵyn aýdanynda eki adam ustaldy. Olardan 5 myń pistolet (2880 dana) jáne avtomat (2160 dana) patrondary bar tsink jáshikteri, bronejilet, qalqan, tizeqorǵaǵyshtar túrindegi arnaiy quraldar, 2 tankige qarsy snariad, tegis uńǵyly qarý, 7 pnevmatikalyq vintovka, onyń ishinde bireýi optikalyq kózdegishimen jáne pnevmatikalyq pistolet alyndy», - dedi ol.
Almaty qalasyndaǵy tártipsizdikter kezinde kúdiktiler toby jeńil avtomashinamen «Orýjeinik» ańshy dúkenine kelip, kireberis esigin syndyryp, 15 tegis uńǵyly qarý men 4 oiyq uńǵyly karabindi, onyń ishinde optikalyq kózdegishimen jymqyrǵan. Urlanǵan qarýdy odan ári satý maqsatymen Almaty qalasy men Almaty oblysy aýmaǵynda arnaiy jabdyqtalǵan oryndarda zańsyz saqtaǵan. Sonymen qatar, tergeý barysynda kórsetilgen adamdardyń Almaty qalasynyń áýejaiyna shabýylǵa jáne qiratýǵa qatysqany anyqtaldy.
«Sondai-aq Almaty qalasynda jappai tártipsizdikterdiń bir qatysýshysy ustaldy. Ol anyqtalmaǵan úsh adammen toptasyp túngi ýaqytta «Kamerat» ańshy dúkeniniń buzylǵan qabyrǵasynan kirip, otty qarýdy jymqyryp eki jeńil avtokólikpen alyp ketken. Urlanǵan múliktiń bir bóligi, 8 tegis uńǵyly qarý oq-dárisimen turǵyn úidiń shatyrynan tabylyp alyndy. Ózge jasyryn orynnan jappai tártipsizdikter barysynda qoldanylǵan zattardy, iaǵni signaldy revolverdi oq-dárisimen, janǵysh qospaly 4 shyny bótelkeni, protivogaz ben politsiia qyzmetkerleriniń arnaiy quraldarynyń 6 jiyntyǵyn politsiia qyzmetkerleri taýyp aldy», - dedi S. Ádilov.
