Foto: videodan skrinshot
Jelide 1 million teńge shaipul alǵan daiashynyń videosy jurtty tańǵaldyrdy, dep habarlaidy Ult.kz.
Bul tosynsyi Almatyda bilim alyp júrgen 18 jastaǵy stýdent qyzdyń ómirin ózgertken sátterdiń biri boldy. Eki jumys istep, shetelge shyǵýǵa aqsha jinamaq bolǵan boijetken dál mundai jomarttyqty kútpegenin aitady.
Stan.kz basylymyna bergen suhbatynda Adema Asqarova Shymkentten kelgenin, QazBSQA ýniversitetinde 2-kýrsta oqitynyn aitqan. Ol Almatydaǵy shaihanalardyń birinde jumys istep júrgenine áli bir ai da bolmaǵan. Oqiǵa túski ýaqytta oryn alǵan. Shaihanaǵa kelgen beitanys alty adam eki topqa bólinip otyrdy. Qyzmetin ádettegidei sypaiy kórsetken daiashy olardan erekshe eshteńe kútpegen. Qonaqtar jeńil taǵamdar ǵana aityp, QR arqyly tólem jasaǵan. Biraz ýaqyttan soń daiashyny atymen shaqyryp, meiramhana jaily pikir aityp jatqan sátterin videoǵa túsire bastaǵan.
Sol sátte olar boijetkennen ómirinde alǵan eń kóp shaipulynyń kólemin suraidy. Ol 15 myń teńge ekenin aitqan. Jaýaptan keiin qonaqtar oǵan 1 million teńge tabystap, bul syilyq ekenin jetkizgen. Áýelde muny ázil nemese jalǵan aqsha dep qabyldaǵan qyz tómengi qabatqa baryp, aqshany sanaǵan – 20 myń teńgelik 50 kýpiýra eken. Sálden soń bankomatqa baryp, qarajatty birden shotyna salyp kórgen.
Daiashy qyz bul jańalyqty alǵash bolyp ata-anasyna jetkizgen. Aitýynsha, jaz boiy aqsha jinap, "Work and Travel" baǵdarlamasyna qatysýdy armandap júrgen. Oqý aiaqtalǵansha mundai múmkindikke ie bolý úshin endi bir-aq jyly qalǵan. Sondyqtan da ol eki jumys istep, 2 million teńge jinaýdy maqsat etken.
Al jumys isteitin shaihana ákimshiligi de, áriptesteri de bul oqiǵaǵa tańdanystaryn jasyrmaǵan. Qyzmettesteri azdap qyzǵana qaraǵanymen, erekshe oqiǵa jumys ornynda kóptiń esinde qalatyn sátke ainaldy.
