Almatyda aýa raiynyń kúrt qubylýyna bailanysty turǵyndar men qala qonaqtaryna taýǵa barmaý jóninde eskertý jasaldy. Bul týraly qalalyq Tótenshe jaǵdailar departamenti habarlady.
Sinoptikterdiń boljamyna sáikes, 11 mamyr kúni Almatyda naizaǵai oinap, jańbyr jaýady, kei jerlerde qatty nóser kútiledi. Sonymen qatar, soltústik-batystan soǵatyn jeldiń ekpini sekýndyna 15–18 metrge deiin jetýi múmkin.
Ásirese Ile-Alataýynyń taýly aimaqtarynda jaǵdai kúrdelirek. Aqsai jáne Úlken Almaty ózenderiniń alaptarynda qatty jańbyr, naizaǵai, burshaq jáne ekpini 18–23 m/s-qa deiin jetetin kúshti jel boljanyp otyr.
Osyǵan bailanysty TJD azamattardy qaýipsizdik sharalaryn qatań saqtaýǵa shaqyryp, daýyldy eskertý kezinde taýǵa shyqpaýdy qatań túrde usynady.
Mamandar qatty jel kezinde myna erejelerdi ustanýǵa keńes beredi: kólikti aǵash astyna qaldyrmaý, múmkindiginshe úiden shyqpaý, tereze men esikterdi myqtap jabý, balkon men aýladaǵy jeńil zattardy jinaý. Eger dalada bolsańyz, jaqyn mańdaǵy ǵimaratqa panalap, jarnama qalqandary, aǵashtar men aiaqtalmaǵan qurylystardan alys júrgen jón. Sondai-aq elektr jelilerine jaqyndamaý jáne úzilgen symdarǵa qol tigizbeý qajet.
