Almatydaǵy "Ǵylymi pediatriia ortalyǵy jáne balalar hirýrgiiasy" aýrýhanasynda rakpen aýyratyn birneshe balaǵa S gepatiti virýsynyń juǵý faktisine bailanysty tekserý bastaldy. Birneshe ata-ana jergilikti "Astana" telearnasyna bergen suhbatynda leikemiiaǵa shaldyqqan balalarǵa qan quiǵan kezde infektsiia juqqan bolýy múmkin dep aitqan.
Al ǵylymi ortalyq bul boljamdy joqqa shyǵarady. Ortalyq mamandarynyń aitýynsha, S gepatiti balalardan aýrýhanaǵa túspei turyp anyqtalǵan.
Dárigerlerdiń aitýynsha, qazirgi kezde ǵylymi ortalyqta S gepatitin juqtyrǵan 11 bala emdelip jatyr. Ekeýinen infektsiia biyl anyqtalǵan. Qalǵandaryna virýs odan buryn juqqan.
"Ǵylymi pediatriia ortalyǵy jáne balalar hirýrgiiasy" mekemesi tóraǵasynyń orynbasary Lázzat Manjýovanyń sózine qaraǵanda "qazir balalardyń jaǵdaiy turaqty, oqshaýlanǵan palatalarda onkologiialyq aýrýdan emdelip jatyr". Remissiiadan soń gepatitke qarsy em taǵaiyndalady.
"Naqty jaǵdaida [balalarǵa] qai kezeńde infektsiia juqqanyn anyqtaý qiyn. Biraq epidemiologiialyq zertteý júrgiziledi. Eń bastysy - shara qoldaný. Bul balalar negizgi aýrý boiynsha em qabyldaýdy jalǵastyra beredi, sebebi gepatitti emdeýge bolady, dári-dármek te bar" deidi Manjýova.
2013 jyly mamyr aiynda astanadaǵy ana jáne bala ǵylymi ortalyǵynda leikemiiadan emdelgen 30 balaǵa S gepatiti juqqany belgili bolǵan. Ata-analar olarǵa qan quiý kezinde infektsiia juǵýy múmkin dep topshylaǵan. Sol kezde qalalyq sanitarlyq-epidemiologiialyq qyzmettiń tekserý júrgize bastaǵany habarlanǵan edi. Ortalyq basshylyǵy balalarda aýrýhanaǵa túskenge deiin virýs bolǵan dep málimdegen.
