Almatyda terrorizmge qarsy operatsiia bastalǵaly beri 2 601 adam ustaldy. Bul týraly Almaty qalasy komendatýrasynyń aqparattyq ortalyǵy málim etti, dep habarlaidy QazAqparat.
Komendatýra málimetinshe, arnaiy operatsiia barysynda Almatyda lańkestik, tonaý jáne basqa da qylmystardyń 2 601 qatysýshysy ustaldy. 127 atys qarýy men 4 077 oq-dári tárkilendi.
«Ótken táýlikte «102» pýltine 329 habarlama kelip tústi. Komendatýranyń koll-ortalyǵyna azamattardan jedel áreket etýdi talap etetin 48 dabyl qabyldandy. Barlyq habarlama der kezinde óńdeldi», - deidi Almaty qalasy komendatýrasynyń resmi ókili Saltanat Ázirbek.
Sonymen qatar ol turǵyndardy komendant saǵatyn buzbaýǵa shaqyrdy.
