Búgin Almaty ákimi Baýyrjan Baibek qala ishindegi jumys sapary kezinde BRT jelisine jańa baǵyttar boiynsha shyǵatyn syiymdylyǵy joǵary 18 metrlik avtobýstardy kórdi, dep habarlaidy QazAqparat tilshisi.
Jolaýshylar aǵynynyń artýyna orai BRT jelisinde №205 jańa baǵyt ashyldy, mundaǵy kólik Mustafin - Rysqulbekov - Súleimenov - Jandosov - Timiriazev - Jeltoqsan (keri baǵytta Naýryzbai batyr) - Tóle bi kóshelerin, Shyǵys ainalma jolyn jáne «Jetisý» bazaryn qamtidy.
Bul baǵyt boiynsha qyzmet kórsetý úshin 30 jańa kólik ár 5 minýt saiyn jolǵa shyǵyp otyrady. Tómen edendi avtobýstardyń syiymdylyǵy 180 adamnan asady. Kólikter konditsionerlermen, videobaqylaý kameralarymen, eńkeigish kýzovpen jabdyqtalǵan. Ári ekologiialyq standarttarǵa sai Evro-5 janarmaiymen júredi.
18 metrlik avtobýstyń tórt esiginiń árqaisysyna «OŃAI» terminaly ornatylǵan.
«Qala basshylyǵynyń qoǵamdyq kóliktegi servis sapasyn arttyrýǵa qatysty tapsyrmasyna orai qazirdiń ózinde 600 júrgizýshi biliktilik Ortalyǵynda kásibi sheberlikterin jetildirýde. Jol erejesi jáne kúizelistiń aldyn alý, alǵashqy meditsinalyq kómek kórsetý, jolaýshylarǵa mádenietti qyzmet kórsetý boiynsha treningter ótýde», - dedi Almaty ákiminiń orynbasary Erlan Áýkenov.
Qalanyń Kólik holdinginiń basshysy Sadir Hamraevtyń aqparaty boiynsha ótken qazan aiynda «OŃAI» kartasy boiynsha 31 million tranzaktsiialanǵan. Bul osy ýaqytqa deiingi rekordtyq kórsetkish.
Aita keterligi, jyl aiaǵyna deiin Almatyda qoǵamdyq kóliktiń úlesi 87 paiyzǵa jetetin bolady. Ótken aptada qalaǵa taǵy 200 jańa avtobýs kelgen bolatyn.
