Almatyda bos turǵan ǵimarattar mektep, balabaqsha, emhana retinde qoldanysqa berilip jatyr. Bul týraly onlain brifing barysynda Almaty Memlekettik aktivter basqarmasynyń basshysy Rústem Áliev aitty, dep habarlaidy QazAqparat.
Qala ákimi Baqytjan Saǵyntaevtyń tapsyrmasy boiynsha, jumysy toqtap turǵan ǵimarattar áleýmettik nysandarǵa - mektep, balabaqsha emhanalarǵa beriledi.
Rústem Álievtiń aitýynsha, biyl qala respýblikalyq menshikten bos turǵan eki nysandy qabyldady.
«Túrksib aýdanyndaǵy M.Tynyshbaev kóshesindegi 4/6-úi qaita jańartyldy. Aýdany 491,3 sharshy metr keshen psihonevrologiialyq patologiiasy bar múgedek balalarǵa arnalǵan 60 orynǵa eseptelgen kúndiz qabyldaityn ortalyq bolyp ashylady. Sonymen qatar, Bostandyq aýdanyndaǵy Almaly baq kóshesindegi 4A-úidegi aýdany 196,9 sharshy metr ǵimaratta «Baqytty otbasy» keshendi baǵdarlamasy aiasynda «Isker Ana» ortalyǵyn ashý josparda»,– dedi ol.
Sonymen qatar, ol jeke zańdy tulǵalardan syiǵa tartý sharty boiynsha úsh nysan qabyldanǵanyn jetkizdi.
«Bostandyq aýdanynda Egizbaev kóshesi, 7 A, aýdany 3115,7 sharshy metr bolatyn balabaqsha qaita jańartylyp 150 orynǵa eseptelgen №191 memlekettik balabaqsha bolyp ashyldy. Balabaqsha tuzdy shahtamen jáne sensorlyq bólmemen jabdyqtalǵan. Odan bólek, Almaly aýdanyndaǵy S.Máýlenov kóshesi, 46 mekenjaiyndaǵy «Elit Tower» turǵyn úi kesheniniń birinshi qabatyndaǵy aýdany 217,1 sharshy metr turǵyn úi emes ǵimaratty jergilikti turǵyndardyń qajettilikterin eskere otyryp, oqyrmandarǵa qyzmet kórsetý úshin ashyq aimaqtarmen koýorking ortalyq kitaphanasyn ashý kózdeledi. Al «Atakent» aýmaǵyndaǵy abattandyrý obektileri aýdan ákimdiginiń kommýnaldyq menshigine ótkennen keiin, ýaqytyly qyzmet kórsetýdi jáne kútim kórsetýdi uiymdastyrdy», – dedi R. Áliev.
Aýdany 59,5 sharshy metr bolatyn Jetisý aýdanyndaǵy bos turǵan ǵimaratty kommýnaldyq menshik obektilerin qaita bólý arqyly dombyra mektebi ashyldy. Onda balalar halyq aspaptarynda oinaýdy tegin úirenedi.
