Almaty qalasynyń ákimi Erbolat Dosaev biznes ókilderimen birge shyǵyndy óteýdi jedeldetý máselelerin talqylady, dep habarlaidy QazAqparat.
Almaty qalasynyń ákimi Erbolat Dosaev qańtar tragediiasy kezinde japa shekken kásipkerlermen, biznes ókilderimen kezdesti. Jiyn barysynda biznes shyǵynyn óteýge jumsalatyn tólemderdi jedeldetý máselesi sóz boldy.
Ákimdikten málim etkendei, buǵan deiin Aimaqtyq komissiia shyǵyndy óteý boiynsha mehanizmde kinárat baryn anyqtap, óz tarapynan naqty usynystar engizgen bolatyn. Ákimdiktiń usynystary 2022 jylǵy 1 aqpanda QR Ulttyq ekonomika ministrligimen jedel túrde kelisilip, úkimettik komissiia deńgeiinde maquldandy. Búgin shyǵyndy óteý erejesine tiisti ózgerister men tolyqtyrýlar engiziledi.
«5 mln teńgege deiingi eń joǵary tólem somasymen jeńildetilgen mehanizm boiynsha zaqymdalǵan jyljymaly ári jyljymaityn múlikke, qalpyna keltirýge kelmeitin jáne joǵalǵan jabdyqtarǵa da shyǵyndy óteý mehanizmi qarastyrylyp otyr. Sonymen qatar memlekettik biýdjet qarajatynan bólek, qorlardyń jeke aqshalarynan da tólem júrgizý máselesi qarastyrylýda. Iaǵni, ótemaqy tóleý protsesin jetildirý jumystary jalǵasa beredi», - delingen baspasóz habarlamada.
Eske salsaq, zardap shekken kásipkerler kommýnaldyq shyǵyndardy tóleýden 3 aiǵa, al qaladaǵy kommýnaldyq menshikti jalǵa alýshylar – 6 aiǵa jalǵa alý tóleminen bosatylǵan.
Sonymen qatar, «Almaty Biznes-2025» baǵdarlamasy boiynsha kásipkerlerge kepil usyný arqyly 10 mln teńgege deiin jyldyq 2 paiyzben 12 aiǵa nemese «Almaty» AÓK ishinara kepildigimen jeńildetilgen nesie beriledi. «Almaty Finans» JShS men «MFO Almaty» JShS zardap shekken kásipkerlerge negizgi qaryzdy óteý merzimin uzartady, aiyppuldar men ósimpuldardy 180 kúnge deiin shegeredi.
