Almaty ákimi Baqytjan Saǵyntaev óziniń Instagram-daǵy paraqshasynda megapoliste jumysqa turý júiesiniń qalai atqarylatyny týraly beinerolik jariialady, dep habarlaidy "Ult aqparat".
Beinerolikte keltirilgen málimet boiynsha aǵymdaǵy jyly qalada 56 myń jumys orny ashylady. Onyń ishinde 26 myń jumys orny «Jumyspen qamtýdyń jol kartasy» baǵdarlamasy boiynsha. Osy baǵdarlama aiasynda jol jóndeý, qoǵamdyq keńistikter men basqa da oryndardy abattandyrý jobalary júzege asatyn bolady.
«Jumys izdegen qala turǵyndary qalalyq jumyspen qamtý ortalyǵyna júginedi. «Eki qolǵa bir kúrek izdegen» 27 myń azamattyń 13,5 myńy jumyspen qamtyldy. Olardyń ishinde kúzet kompaniiasyna jumysqa turǵan Dina Erekeshova bar», - dep jazdy B.Saǵyntaev.
Rolikte baiandalǵandai, D. Erekeshova uzaq ýaqyt jumys taba almaidy. Keiin Jumyspen qamtý ortalyǵyna júginýdi jón kórip, atalǵan mekemege barady. Munda ol qajetti barlyq keńesterdi alady jáne usynylǵan bos oryndardyń ishinen ózine kerektisin tańdaidy. Qazirgi kezde almatylyq áiel kúzet agenttigende jumys isteidi.
«Bizdegi «Eńbek» nátijeli jumyspen qamtýdy jáne jappai kásipkerlikti damytý baǵdarlamasynda úsh baǵyt bar: qoǵamdyq jumystar, áleýmettik jumys oryndary jáne jastar tájiribesi», - dep atap ótti Almaty ákimi.
