Foto: Almaty qalasynyń ákimdigi
Almatyda sot sheshimimen trotýarda jáne jalpyǵa ortaq jerlerde ornalasqan birneshe saýda núktesi men dámhana súriledi, - dep habarlaidy "Ult aqparat" qala ákimdiginiń baspasóz qyzmetine silteme jasap.
Ákimdik málimetinshe, kásipker Tóle bi men Momyshuly kósheleriniń qiylysyndaǵy bul jerdi jalǵa alý quqyǵynda úsh jyl merzimge ielengen. Jaldaý merzimi aiaqtalǵan soń biznesmen jer telimin memlekettik qorǵa qaitarýy kerek edi, biraq ol muny óz erkimen jasaýdan bas tartqan. Sondyqtan Almatynyń qala qurylysyn baqylaý basqarmasy sotqa tiisti talap aryzben júgingen.
"Nátijesinde, 2021 jyldyń qyrkúieginde aýdanaralyq ekonomikalyq sot óz betinshe salynǵan ǵimarattardy buzyp, jerdi jalpy paidalanýǵa qaitarý týraly sheshim qabyldady.
Almaty qalalyq soty menshik iesiniń talap aryzyn qaraýsyz qaldyrdy. Qazir birinshi satyly sottyń sheshimi zańdy kúshine endi. Ǵimarattardy buzý merzimin sot oryndaýshysy taǵaiyndaidy", - delingen habarlamada.
