Baqytjan Saǵyntaevtyń tapsyrmasy boiynsha qala ákiminiń orynbasary Erjan Babaqumarov onlain formatta aýdan ákimdikteri, aýdandyq bilim bóliminiń basshylary, bilim berý uiymdarynyń direktorlary jáne qalanyń múddeli organdary ókilderiniń qatysýymen bilim berý oshaqtarynda balalardyń qaýipsizdigi máseleleri boiynsha keńes ótkizdi, dep habarlaidy "Ult aqparat".
Keńes barysynda bilim berý uiymdaryndaǵy qaýipsizdik, kámeletke tolmaǵandar arasyndaǵy qylmys pen sýitsidtik minez-qulyqtyń aldyn alý máseleleri, býllingke qarsy is-qimyl jónindegi sharalar qaraldy.
Qalalyq bilim basqarmasynyń basshysy Lázzat Jylqybaevanyń, sondai-aq Almaty qalasy prokýratýra ókiliniń baiandamalary tyńdaldy.
Qazirgi ýaqytta memlekettik mektepterde, internattyq mekemeler men kolledjderde ishki jáne syrtqy beinebaqylaý kameralary jumys isteidi. Bilim berý uiymdarynda 400-den astam mektep psihologtary men 140 mektep inpektorlary bar.
Keńes qorytyndysy boiynsha Almaty qalasy ákiminiń orynbasary Erjan Babaqumarov bilim berý uiymdarynda, ásirese mektepter men kolledjderde qosymsha qaýipsizdik sharalaryn engizý boiynsha birqatar naqty tapsyrmalar berdi.
Bilim basqarmasyna qoǵamdyq densaýlyq basqarmasymen jáne qalalyq politsiia departamentimen birlesip vedomstvoaralyq aldyn alý, tárbie jumystaryn kúsheitý tapsyryldy.
Birinshiden, barlyq bilim berý uiymdaryn «soqyr aimaqtardy» eskere otyryp, beinebaqylaý júielerimen jaraqtandyryp, olardy turaqty baqylaýdy qamtamasyz ete otyryp, politsiia departamentiniń jedel basqarý ortalyǵyna shyǵarýdy qamtamasyz etý qajet.
Balalardyń jáne barlyq qyzmetkerlerdiń qaýipsiz bolýy úshin bilim berý uiymdarynyń basshylary ótkizý rejiminiń saqtalýyna jáne kezekshiliktiń uiymdastyrylýyna, vahterlerdiń, kúzetshilerdiń jumysyna, jazbalardy mindetti túrde saqtai otyryp, úzdiksiz beinebaqylaýdyń qamtamasyz etilýine turaqty baqylaýdy jalǵastyrýy, sondai-aq qaýipsizdik qaǵidalaryn saqtaý boiynsha turaqty túsindirý jumysyn júrgizýi qajet.
Osy baǵytta árbir bilim berý mekemesiniń kirý tobyna sheńberler men týrniketter ornatý, balalar mekemelerin mamandandyrylǵan kúzetpen qamtamasyz etý máselesin qaraý tapsyryldy.
Ekinshiden, psihologiialyq qyzmettiń, atap aitqanda mektep psihologtary men synyp jetekshileriniń sapaly jumysyn qamtamasyz etý tapsyryldy. Psihologiialyq portret jasaý, onyń ishinde «Qaýipti toptar» sanatyn anyqtaý úshin jumysty kúsheitý qajet.
Erekshe jaǵdailarda kolledj, mektep, balabaqsha qyzmetkerleri úshin is-qimyl algoritmin ázirleý, sondai-aq azamattyq qorǵanys jáne tótenshe jaǵdailar boiynsha oqý-jattyǵýlardy ótkizý praktikasyn jalǵastyrý tapsyryldy. Sondai-aq, kompiýterlik tehnikaǵa tyiym salynǵan saittardan súzgiler ornatylady.
Bilim berý uiymdarynyń aýmaǵyn jáne oǵan irgeles jatqan aýmaqtardy, jekelegen kóshelerdi jaryqtandyrý, sondai-aq jasandy jol kedergilerin, baǵdarshamdar men mektepterdiń janynda toqtaýǵa tyiym salatyn belgilerdiń sanyn ulǵaitý máselelerine erekshe nazar aýdaryldy. Bul baǵytta jumystardy aýdan ákimdikteri júrgizýde.
