Almatyda Ashimov kóshesindegi Tandau turǵyn úi kesheniniń aýlasynda 4 jastaǵy qyzǵa beitanys er adam tiisip ketken. Bul týraly balanyń anasy áleýmettik jelide jazdy, dep habarlaidy ult.kz.
Áieldiń aitýynsha, belgisiz jas jigit jabyq aýmaqqa kirip, átkenshekte oinap otyrǵan qyzdyń janyna barǵan. Ol balany qushaqtap, betinen súie bastaǵan.
Oqiǵany basqa bala baiqap, jaqyn mańda kishi ulymen júrgen qyzdyń anasyn shaqyrǵan. Áiel beitanys adamnan ne istep jatqanyn suraǵanda, er adam ózin qyzdyń aǵasy retinde tanystyrǵan. Alaida anasy aralasqannan keiin ol oqiǵa ornynan qashyp ketken.
Keiin balanyń anasy kúdikti er adamnyń ustalǵanyn habarlaǵan. Onyń sózinshe, er adamnan lezvie tabylǵan, sondai-aq ol buǵan deiin urlyq jasaǵany úshin sottalǵan bolýy múmkin. Alaida jetkilikti negiz bolmaǵandyqtan, er adam keiin bosatylǵany aityldy.
Sondai-aq áiel er adamnyń aýlaǵa qaita kelemin dep qorqytqanyn málimdegen.
Almaty politsiia departamentiniń málimetinshe, oqiǵaǵa qatysty Naýryzbai aýdandyq politsiia basqarmasy tekserý júrgizip jatyr.
«Er adamnyń jeke basy mindetti túrde anyqtalyp, onyń áreketine quqyqtyq baǵa beriledi. Fakt rastalǵan jaǵdaida ol zańǵa sáikes tiisti jazasyn alady», – dep málimdedi Almaty qalasy politsiia departamenti.
