Almaty ákimdigi qyzmet kórsetý men saýda kásipkerlikterine qoiylǵan shekteýdi keńeitý týraly sheshim shyǵardy. Bul týraly búgin onlain brifing barysynda qala ákiminiń orynbasary Saparbek Tuiaqbaev aitty, dep habarlaidy "Ult aqparat".
«Búginnen bastap biz qyzmet kórsetý jáne saýda salasyndaǵy keibir kásipkerlik nysandarynyń jumysyna qoiylǵan shekteýdi keńeitý týraly sheshim shyǵardyq. Munyń aldynda iri saýda oryndary, saýda oiyn saýyq ortalyqtary, sulýlyq salondary, qoǵamdyq tamaqtaný oryndary jabyq bolatyn. Al erteńnen bastap jańa rejim kúshine enedi. Iaǵni azyq túlik dúkenderi men dárihanadan basqa barlyq nysandar jabylady», - dedi Saparbek Tuiaqbaev.
Onyń aitýynsha, ákimdik karantin rejimin saqtaýdy barynsha qadaǵalap jatyr. Alaida quqyqbuzýshylyq derekteri de jeterlik.
Keibir saýda oryndary ashyq bolsa, keibirinde qyzmetkerler maskasyz qyzmet kórsetip jatyr.
«Barlyq quqyqbuzýshylyq týraly jazylyp, jariialanyp jatyr. Olarǵa quqyqtyq baǵa berilýde. Ákimdik kúnde monitoring júrgizetin bolady. Aqparat quraldarynda barlyq quqyqbuzýshylyq jaily jariialaityn bolamyz», - dedi ákimniń orynbasary.
Al qalada dámhana men qoǵamdyq tamaqtaný oryndarynan ádettegidei tamaqty úige alyp ketýge bolady.
«Erteńnen bastap barlyq azyq-túlik emes saýda oryndarynyń úlken-kishiligine qaramastan qyzmet etýine tyiym salynady. Avtosalon, avtobólshekter saýdasy, gúl satatyn pavilondar da jabylady. Himiialyq tazalaý, fotosalon, optika salondary, lombard, jyljymaityn múlik boiynsha agenttikter, TQKO túgel jabylady», - dedi sheneýnik.
