Almatyda Qazaqstan Qarýly Kúshterine qarasty áskeri bólimde aty ańyzǵa ainalǵan «Qara maior», polkovnik Boris Kerimbaevqa arnalǵan eskertkish taqtasynyń saltanatty ashylýy ótti.
Bul týraly QR Qorǵanys ministrliginiń baspasóz qyzmeti habarlady.
Saltanatty sharada áskeri bólimge Boris Kerimbaevtiń esiminiń berilýi áskeri qyzmetshilerge júktelgen jaýapkershilikti sezinýge yntalandyrady jáne ol halyqqa qyzmet etýdiń úlgisi bolmaq. Sharaǵa bólimniń jeke quramy men basshylyǵy, Qarýly Kúshterdiń ardagerleri men polkovnik Kerimbaevtyń jubaiy qatysty.
«Búgin meniń qýanyshymda shek joq. Árine joqtyń orny tolmas. Osy sapta turǵan bárińiz úshin naǵyz ustaz bola bildi. Men barlyqtaryńyzǵa myqty densaýlyq, otbasylaryńyzǵa amandyq tileimin. Jetken jetistikterińizben quttyqtaimyn», - dedi Raisa Kerimbaeva.
Esterińizge sala keteiik, áskeri barlaý qyzmetine qosqan úlesi men orny erekshe ekenin eskere otyryp, 2019 jylǵy 4 qyrkúiektegi Qorǵanys ministriniń buiryǵymen arnaiy maqsattaǵy áskeri bólimge Boris Kerimbaevtyń aty berildi.
Polkovnik B. Kerimbaev, V.I. Lenin atyndaǵy Tashkent joǵary jalpyáskeri komandalyq ýchilishesin támamdaǵan. Motoatqyshtar vzvodynyń komandiri, Orta Aziia áskeri okrýgynyń barlaý rotasynyń, shtabynyń jáne motoatqyshtar batalonynyń basqarýshy qyzmetterin atqarǵan.
1981 jyly Kerimbaev Aýǵan eline jiberilgen bolatyn. Ol basqarǵan jasaq Pandshir shatqalyndaǵy Ahmad Shah Masýdtyń modjahedter quramalaryna qarsy turǵan. Segiz aiǵa sozylǵan udaiy atystardan, qonystaný operatsiialary men reidterden keiin modjahedterdiń basshysy ýaqytsha bitimge kelisýge májbúr boldy. Nátijesinde Keńes áskerlerine qarsy toptardyń jaýyngerlik is-qimyldary toqtatyldy.
Óz jasaǵy «Qara maior» dep atap ketken sardardyń esimi barlyq áskeri qyzmetshilerdiń máńgi esinde qaldy. Aýǵan elinen keiin Kerimbaev 22-shi arnaiy maqsattaǵy brigada komandiriniń orynbasary, 546-shi arnaiy maqsattaǵy oqý polkiniń komandiri bolyp qyzmet etti. 1992 jyly densaýlyq jaǵdaiyna bailanysty polkovnik áskeri ataǵymen Qarýly Kúshter qatarynan shyǵaryldy.
2019 jyly 12 aqpanda uzaq aýrýdan keiin Boris Kerimbaev Almaty qalasynda ómirden ótti.
