Foto: Ónerkásip jáne qurylys ministrligi
Almatynyń indýstrialdy aimaǵynda Almaty Autoparts Production jańa zaýytynyń ashylý saltanaty ótti,- dep habarlaidy Ult.kz Ónerkásip jáne qurylys ministrligine silteme jasap.
«Almaty Autoparts Production» ashylý saltanaty QR Ónerkásip jáne qurylys ministrligi Ónerkásip komitetiniń tóraǵasy Azamat Panbaev, «Youngsan» kompaniiasynyń tóraǵasy Pak Chon Bom jáne «Astana Motors» kompaniiasynyń negizin qalaýshy Nurlan Smaǵulovtyń qatysýymen ótti.
Qazaqstandyq «Astana Motors» kompaniiasy men «Youngsan» avtokomponentter óndirýshisi (Koreia Respýblikasy) Almatynyń Indýstrialdy aimaǵynda avtokólik oryndyqtaryn shyǵaratyn birlesken kásipornyn iske qosty. Lokalizatsiianyń birinshi kezeńinde ortaq investitsiia kólemi 4 mlrd teńgeni qurady.
2024 jyldyń jeltoqsan aiynda kompaniia oryndyqtarǵa arnalǵan kóbikti qalyp-pishinderdiń synama partiiasyn shyǵaryp, sertifikatsiiadan ótip, ónimderdi Hyundai jeńil avtokólikter óndirisine jetkizý maqsatynda «Hyundai Motor Company» (Koreia Respýblikasy) kelisimin aldy.
Halyqaralyq standart talaptary men qyzmetkerlerdiń biliktilik deńgeiiniń sáikestigi rastalǵan soń, kásiporyn oryndyqtardy óndirý boiynsha tehnologiialyq operatsiialardy júzege asyrý maqsatynda memleketpen kelisimge otyrdy.
«Prezident el ekonomikasyn damytýdaǵy jeke investorlardyń mańyzdy róline toqtap, kásiporyndarǵa jumys oryndaryn saqtaý jáne óndiristi jańǵyrtý boiynsha kóńilge qonymdy mindettemeler júktelýi tiis ekenin atap ótti. Biz moinymyzǵa alǵan mindetterimiz aldyndaǵy jaýapkershilikti tolyqtai sezinemiz. Osy maqsatta syrtqy faktorlarǵa táýeldilikti azaitý, avtokólik ónerkásibinde bilikti injenerler býynyn daiyndaý, sonymen birge shaǵyn jáne orta biznesti damytýǵa járdemdesý úshin avtokomponentter men shikizat óńdeýdiń qomaqty úlesin lokalizatsiialaýǵa qarai baǵyt alyp kelemiz», – dedi «Astana Motors» bas direktory Beknur Nesipbaev.
«Almaty Autoparts Production» óndiris qýaty jylyna 100 myń oryndyq jinaǵyn quraidy. Joba «Hyundai Trans Kazakhstan» zaýytynda usaq túiindi óndirisi arqyly Hyundai Tucson modeline arnalǵan oryndyqtardy shyǵarýdy bastady. Jaqyn arada zaýyt Hyundai Santa Fe modeline arnalǵan oryndyqtardy óndiredi.
«Biz «Astana Motors» pen «Youngsan» arasyndaǵy bekem bailanysqa negizdelgen bastamalarymyzdyń nátijesin kórip otyrmyz. Bul tek alǵashqy qadam ǵana. Álemde jáne TMD aimaǵyndaǵy avtokólik ónerkásibindegi qarqyndy ózgeristerdi eskere otyryp, biz osy baǵytta únemi jumys isteitin bolamyz», – atap ótti «Youngsan» tóraǵasy Pak Chon Bom.
Bolashaqta Kásiporyn óz ónimderin jańa «Astana Motors Manufacturing Kazakhstan» mýltibrendti zaýytyna, sondai-aq basqa da avtokólik kásiporyndaryna jetkizýdi josparlap otyr.
«Almaty Autoparts Production» kásipornynyń mamandary kóbikti qalyp-pishinderdi óndirýdiń tehnologiialyq operatsiialaryn meńgerdi. 2026 jyly zaýyt jetkiziletin shikizattan oryndyq qaptamasyn tigý boiynsha lokalizatsiianyń ekinshi kezeńine shyǵady. Kásiporyn tigin tsehyn ashyp, ony jabdyqtaýǵa jáne kadrlardy oqytýǵa qosymsha 720 million teńge investitsiia jumsaýdy kózdep otyr.
