Foto: pixabay.com
Almaty avtobýstarynda júrgizýshi otyratyn jer qorshalatyn bolady, - dep habarlaidy Kazinform agenttigi.
«Dabyl túimesine keler bolsaq, bizge usynys tústi. Qazir tehnikalyq múmkindikter qarastyrylyp jatyr, eger bolashaqta muny jasaýǵa múmkindik bolsa, árine, iske asyramyz. Bul másele áli de talqylanýda. Sondai-aq qazir jańa avtobýstar satyp alynyp jatyr, júrgizýshi men jolaýshy arasyna qalqa ornatýdy josparlap otyrmyz», - dep jaýap berdi qalalyq mobildilik basqarmasynyń basshysy Saǵyndyq Telibaev jýrnalistermen kezdesý barysynda.
Basqarma basshysy bul máseleler 2023 jyldyń jeltoqsanynda bolǵan apattan keiin qarastyryla bastaǵanyn atap ótti.
Eske salaiyq, byltyr jeltoqsan aiynyń sońynda avtobýs bir top adamdy qaǵyp ketken edi.
Politsiianyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áieldi urǵan. Saldarynan ol esinen tanyp, kólikti basqara almai qalǵan.
Apat saldarynan 7 adam zardap shekti. Jedel meditsinalyq qyzmet kelgenshe úsheýi qaitys boldy.
