Almatyda aryqtan tabylǵan 26 jastaǵy áiel óz kúieýiniń qolynan kóz jumǵan. Bul týraly qara jamylǵan otbasynyń dostary habarlady, dep jazady QazAqparat tilshisi.
«Bul kelinshek sol jerdegi úilerdiń birinde qart kisilerdi baǵatyn. Ony kúieýi óltirdi. Bir kún buryn. Jumys isteitin ornyn bilip alyp, sol adreske baryp shaqyrǵan. Shyqqan kezde óltirip tastaǵan. Áieldi bireýler zorlamaq boldy degen oi qalyptastyrǵysy kelip, sheshindirip ketken. Anasynyń aitýynsha, qyzynyń táni kók-ala qoidai eken. Saý tamtyǵy qalmaǵan. Áieldi jumysqa alǵan adamdardan estigenimizdei, soqqydan áieldiń bir qulaǵy jyrtylyp ketken»,- dedi otbasynyń tanysy Valentina Soboleva.
Onyń aitýynsha, áieldiń 6 jastaǵy uly jetim qaldy.
«Olar sońǵy jyldary ajyrasyp ketken. Birge turmaityn. Kúieýi áieliniń artyq qylyǵy bolmasa da, qatty qyzǵanatyn. Jáne balany alyp ketem dep qorqytatyn. Marqum kelinshek otbasyn asyraý úshin qandai jumys bolsyn isteýge tyrysatyn», - dedi ol.
Sońǵy jyldary qaitys bolǵan kelinshek anasymen Aigerim shaǵyn aýdanyndaǵy jeke úilerdiń birinde páter jaldap turyp kelgen.
Politsiia aýladaǵy kameralar arqyly kúdiktini izin sýytpai ustaǵan. Er adam óz kinásin birden moinyna aldy.
Kisi qolynan kóz jumǵan kelinshekti keshe Qaskeleńdegi týysqandary jer qoinyna tapsyrdy.
Qalalyq politsiia atalǵan qylmysqa qatysty tergeý qupiiasyn saqtaý maqsatynda jaq ashpai otyr.
Aita ketý kerek, 9 shilde kúni ál-Farabi kóshesindegi aryqtardyń birinen jas áieldiń denesi tabylǵan bolatyn.
