Almatyda Armeniiadan ákelingen 165 kólik áli tirkeýden ótken joq. Bul týraly Almaty qalasy politsiia departamentiniń basshysy Qanat Taimerdenov óńirlik kommýnikatsiialar qyzmetinde ótken onlain brifingte aitty, dep habarlaidy "Ult aqparat".
«2019 jyly Almaty qalasynyń aýmaǵyna Armeniiadan 501 avtokólik ákelingen. 2020 jyldyń 14 tamyzyndaǵy jaǵdai boiynsha tirkelmegen 165 kólik qaldy. Politsiia departamentiniń Call-ortalyǵynyń qyzmetkerleri Armeniiadan ákelingen avtokólik quraldaryn tirkeý sharttary týraly habardar etý úshin kólik ielerine qońyraý shaldy. Esterińizge sala keteiik, bul naýqan osy jyldyń 1 qyrkúiegine deiin jalǵasady», – dedi Qanat Taimerdenov.
Sonymen qatar, ol Armeniiadan ákelingen kólikterdi tirkeý úshin qansha qarajat ketetin aitty.
«Tirkeý sharttary men kólikterge qoiylatyn talaptarǵa keler bolsaq, olar barynsha ońai jasalǵan. Eń bastysy Armeniiadan ákelingen kólikter 1 qyrkúiekke deiin tirkeýden ótýi tiis. Tirkeý kezindegi mindetti tólemderge keletin bolsaq, úsh tólem bar: tirkeý úshin alym – 695 teńge, tehnikalyq pasport úshin baj – 3 473 teńge jáne memlekettik nómir úshin baj – 7 778 teńge. Tólemniń jalpy somasy 11 946 teńge», – dedi Almaty qalasy Politsiia departamentiniń basshysy.
