Almaty qalasynyń mańynda ornalasqan Almaty-Bishkek avtojolyn keńeitý maqsatynda "Barlyq" bazarynda ornalasqan saýda oryndaryn súrý jumystary bastaldy. 2017 jyldyń sáýir aiyna deiin 25 saýda nysany súriledi, - dep habarlaidy kaz.tengrinews.kz tilshisi Almaty qalasy Jolaýshylar kóligi jáne avtomobil joldary basqarmasynyń basshysy Maqsut Isahov habarlady.
Isahovtyń aitýynsha, joldardy qaita qalpyna keltirý jumystary shamamen 2017 jyldyń ortasynda aiaqtalady. "15 qyrkúiekte ministrmen keńes ótti (QR Investitsiialar jáne damý ministri Jeńis Qasymbek), keiinnen QR birinshi vitse-premeri Asqar Mamin Avtomobil joldary komiteti, "Kazaqavtojol" uiymy men Almaty oblysy ákimdigindegilerdi shaqyrtyp, mynadai sheshimge keldi: Avtomobil joldary komiteti berilgen joldardy qaita qurý úshin jobalyq-smetalyq qujattamany daiyndaýǵa baiqaý jariialaý. 3,5 shaqyrymǵa sozylatyn joldy qaita qurý kerek - Qalqaman yqshamaýdanynan bastap "Asyl Arman" turǵyn úi keshenine deiin", - dedi Maqsut Isahov.
"Barlyq" bazary. © Ainash Óndiris
Súriletin saýda oryndary. © Ainash Óndiris
Onyń aitýynsha, osy ýchaskelerde 10 jolaqtan turatyn joldy salý josparlanyp otyr, iaǵni ár baǵytta bes jolaqtan. "Úsh jolaq tranzittik bolady. Ol Soltústik ainalymdaǵy jolǵa uqsaityn bolady. Bul Qaskelennen baǵyt alǵan kólikterdiń eshbir kedergisiz ótip ketýine múmkindik beredi". Sonymen qatar, ol Qalqaman yqshamaýdanynda jáne "Asyl Arman" turǵyn úi kesheniniń mańynda da eki baǵytta ainalymnyń bolatynyn aityp ótti.
Aldyn ala esep boiynsha, Almaty-Bishkek avtojolyndaǵy ýchaskelerdi qaita qurý jumystaryna shamamen 10 milliard teńge qajet.
Al "Kazavtojol" AQ ókilderi Almaty-Bishkek avtojolynyń 16-20 shaqyrymynda únemi bolatyn kepteliske qatysty máseleni sheshý úshin "Altyn Orda" men "Barlyq" saýda ortalyqtary mańyndaǵy joldarǵa arnaiy joba daiyndalǵanyn aitty.
"Qazirgi ýaqytta bul joba QR Investitsiialar jáne damý ministrligimen kelisildi. Kelesi jyldyń biýdjetinde jobalyq-smetalyq qujattamany daiyndaý úshin 150 million teńge qarastyrylǵan. 2017 jyldyń maýsym aiynda qurylys-montajdaý jumystary bastalady", - dep habarlady "QazAvtoJol" UK" AQ ókilderi.
