Almatynyń Áýezov aýdanynda «Halyq qatysatyn biýdjet» jobasy aiasynda Altyn Besik shaǵynaýdanyndaǵy Trýdovaia kóshesinde qoǵamdyq keńistikti kórkeitý jumystary aiaqtaldy.
Búginde aýmaǵy 1 gektar bolatyn zamanaýi keńistikte turǵyndardyń belsendi demalysyna barlyq jaǵdai jasalǵan. Munda úlken jáne shaǵyn fýtbol alańdary, basketbol alańy, vorkaýt aimaǵy, zamanaýi balalar oiyn kesheni, serýendeýge arnalǵan joldar, jańa oryndyqtar men jaryqtandyrý júiesi paida boldy.
Kógaldandyrý jumystaryna erekshe kóńil bólindi: 30 aǵash pen 300 buta egilip, avtomatty sýarý júiesi ornatyldy. Sonyń arqasynda qoǵamdyq keńistik odan ári jaily ári jasyl aimaqqa ainalady. Turǵyndardyń qaýipsizdigin qamtamasyz etý úshin beinebaqylaý kameralary men zamanaýi syrtqy jaryqtandyrý júiesi ornatyldy.
Búginde qoǵamdyq keńistik shaǵynaýdan turǵyndarynyń súiikti demalys ornyna ainaldy. Balalar oiyn alańdarynda ýaqyt ótkizse, jastar fýtbol jáne basketbol oinap, sportpen shuǵyldanady. Al eresekter demalyp, otbasymen birge serýendeidi.
Biyl Áýezov aýdanynda «Halyq qatysatyn biýdjet» jobasy aiasynda 29 joba júzege asyrylýda. Osynyń arqasynda aýlalar men qoǵamdyq keńistikter turǵyndar úshin zamanaýi, qaýipsiz ári jaily bola tústi.
Fotolar: Almaty qalasy ákimdiginiń baspasóz qyzmetinen
