Sýret: Almaty.tv
«Alaiaqtar jalǵyz baspanamdy tartyp aldy». Osylai degen almatylyq zeinetker úiin órtep jibermek boldy, dep habarlaidy "Ult aqparat" Almaty arnasyna silteme jasap.
66 jastaǵy azamat uiymdasqan bir top adamnyń ózin aldap, jalǵan notariýsqa aparǵanyn aitady. Endi sot oryndaýshylary úidi bosatsyn dep qystap jatyr eken. Bálege qaldym degen aqsaqal ádil tergeý ótip, úiimdi qaitaryp alsam deidi.
Jalǵyzbasty zeinetker oilanbai ot bastym, otbasymnyń uiytqysy bolǵan baspanamdy bázbireýler aldap, atyna aýdaryp aldy dep keiidi. Ol azdai dúnie-múlkimdi de senimime kirip alyp, saýatsyzdyǵymdy paidalanyp, alyp ketti deidi. Endi kúni keshe sot oryndaýshylar kelip, úidi bosat degen kórinedi. Al myna beinejazbany sol kúni kýágerler túsirip alypty.
«Úidiń ishindegi zattyń bárin jinap, tiep qoidy. Shyǵaryp alyp ketemiz dep. Sol kezde ózimdi óltiremin dedim. Úidi alyp alǵan adamdar qashyp ketti», – dedi aryzdanýshy Ábdýáli Tohtaniiazov.
Qariianyń qorǵaýshylary «Qujat tilin meńgergen ákkiler zeinetkerdi uzaq ýaqyttan beri nazarǵa alyp, zerttegen» degen pikirde. Olardyń sózinshe, bul iske aryzdanýshynyń azamattyq nekedegi áieliniń de qatysy bolýy múmkin. Azamattardyń aitqanyna sensek, ol muragerlikke qalǵan qomaqty qarjyny alý úshin úidi kepilge qoiý kerek dep, azamattyń basyn ainaldyrǵan kórinedi.
«385 myń dollar muragerlik aqsha qaldyryldy degen málimetti bul kisilerge tek qolhat retinde kompiýterden shyǵaryp bergen. Negizi ol jalǵan aqsha, ondai aqsha joq. Keiin ol jerge izdep barsa, eshqandai da notariýs joq, olar bir bólmeni jaldaǵan bolsa kerek», – dedi advokat Gúláiym Shyntaeva.
Eń soraqysy, ákkiler qariia úidi kepilge qoiǵan kúni, 55 million teńge aldym dep qolhat jazǵyzyp alady. Biraq ony shaǵymdanýshy qalai jazǵanymdy ózim de bilmeimin dep otyr.
Búgin osy iske qatysty Alataý aýdanynda úidiń satyp-alý mámlesine qatysty qaita qaraý sot otyrysy ótti. Eger úidi basqa azamatqa aýdarý kezinde qujattyq qatelikter dáleldense, qariiany ázirge úiden qýyp shyǵa almaidy deidi. Biraq qazir barlyq qujattyq dálel qarsy taraptyń paidasynda tur deidi qorǵaýshylar. Sony negizge ala otyryp sot oryndaýshylar úidi bosatpaq bolǵan.
«Ne isteimin men endi? Órteimin bárin. Men onda qaida baramyn? Dalaǵa shyǵyp otyrýym kerek pe? Alaiaqtar menen bólek 32 adamdy aldap ketken», – dedi aryzdanýshy Ábdýáli Tohtaniiazov.
Aldanǵanyn kesh ańǵarǵan azamat Alataý aýdany politsiiasyna da aryz qaldyrǵan. O basta is baibalamǵa salynyp, múlde qozǵalmady deidi zeinetker. Tipti tergeýge de shaqyrylmadym dep otyr. Alaida politsiia basqarmasy istiń nazarda ekenin aitady.
«Atalmysh derek boiynsha Alataý aýdany PB190-babynyń 3-tarmaǵy boiynsha iaǵni asa iri kólemde birneshe ret alaiaqtyq deregin jasaý faktisi boiynsha qylmystyq is qozǵalyp, tiisti saraptamalyq zertteýler jáne tiisti tergeý amaldary júrgizilýde», – dedi Almaty qalasy politsiia departamentiniń resmi ókili Saltanat Ázirbek.
Zeinetker maǵan ziian keltirgender endi qorqytýǵa kóshti dep otyr. Tipti, aryzyńdy qaityp al degen hattar da keledi deidi ol. Ázirge qariiaǵa tergeý nátijesin kútýden basqa amal joq.
