Almaty ákimi Baqytjan Saǵyntaev Táýelsizdik kúni qarsańynda jazýshylar qaýymdastyǵymen kezdesti, dep habarlaidy QazAqparat.
Almaty ákimi Baqytjan Saǵyntaev Qazaqstan Jazýshylar odaǵynyń múshelerimen shyǵarmashylyq birlestikti qoldaý jáne damytý máselelerin talqylady, sondai-aq mereitoilyq dataǵa orailastyrylǵan «Almaty-Táýelsizdiktiń altyn besigi» baiqaýynyń qorytyndysy shyǵaryldy.
Shyǵarmashylyq baiqaýǵa metrlermen qatar, jas aqyn-jazýshylar qatysty. Shyǵarmashylyq jumystar tórt janrda usynyldy – poeziia, proza, balalar ádebieti, dramatýrgiia.
Ashat Ómirbaev «Áke, elge qaitaiyqshy!» áńgimesi, Turysbek Sáýketaev «Kókshýlan» novellasy, Dýman Ramazan «Úkim» tarihi dramasy, Patigúl Mahsatova qazaq tilindegi óleńder toptamasy úshin jeńimpaz bolyp tanyldy.
Baqytjan Saǵyntaevtyń tapsyrmasy boiynsha ótken jyly 30 avtordyń jumysyn basyp shyǵarý úshin qarjy bólindi. Jas jazýshylardyń da, qazaq ádebieti klassikteriniń de eńbegi qoldaý tapty. Biyl júzden astam tanymal sóz sheberi men jas avtorlardyń kitaptary jaryq kórdi. Kitaptardyń tusaýkeseri qala kitaphanalarynda ótedi.
«Jazýshylar qaýymdastyǵyn qoldaý jalǵasady. Sizder tarihi oqiǵalardyń shynaiy kýási retinde olardy júrekten ótkizip, oqyrmanǵa jetkizesizder. Táýelsizdiktiń mereitoily jylynda sizderge zor densaýlyq pen shabyt tileimin!», - dedi Baqytjan Saǵyntaev.
Aita keteiik, búginde Qazaqstan Jazýshylar odaǵynyń quramynda 820 múshe bar, olardyń 400-i Almatyda turady. 2019 jyldyń sońynda qalyptasqan dástúrge sai almatylyq aqyn-jazýshylar Almaty ákiminiń grantyna ie boldy.
