Almatyda aqyly avtoturaqtar qalanyń kommýnaldyq menshigine qaitaryldy, - dep habarlaidy "Ult aqparat" Almaty ákimdigi baspasóz qyzmetine silteme jasap.
Baspasóz qyzmeti málimetinshe, monopoliiasyzdandyrý jáne yqtimal shyǵyndy óteý maqsatynda Almaty ákimdigine kompaniia ielerinen "Almaty spetstehparking servis" JShS-niń 70 paiyz mólsherindegi úlesin jáne "Alan Parking" JShS-niń 100 paiyz úlesin qala menshigine qaitarý týraly usynys túsken.
"Almaty spetstehparking servis" JShS biryńǵai operator retinde qalanyń bes aýdanynda (Almaly, Bostandyq, Jetisý, Medeý, Túrksib) ornalasqan trotýar turaqtaryna qyzmet kórsetýge mamandanǵan. Ákimdikke osy JShS-niń 30 paiyzy tiesili.
"AlanParking" JShS 3 aýdanda (Alataý, Bostandyq, Jetisý) ornalasqan alańdaǵy avtoturaqtarǵa qyzmet kórsetý jónindegi biryńǵai operator sanalady. JShS tolyǵymen jekemenshikte boldy", - delingen habarlamada.
Almaty ákimdigi qoldanystaǵy zańnamaǵa sáikes joǵaryda kórsetilgen kompaniialardaǵy úlesterdi qaitarý týraly tiisti qaýly qabyldaǵan.
"Búginde aqyly turaq júiesi shtattyq rejimde jumys isteidi. Qaýlyǵa sáikes, aqyly turaqtar qyzmetinen túsken barlyq kiris biyl 25 sáýirden bastap qala biýdjetine baǵyttalady.
Qazirgi ýaqytta Almaty ákimdigi qalanyń turaq aimaǵyn uiymdastyrý jóninde biryńǵai operator qurý boiynsha jumysty bastady. Qoldanystaǵy zańnamada belgilengen ruqsat berý qujattaryn alý merzimderin, sondai-aq monopoliiaǵa qarsy organdarmen kelisý qajet ekenin eskere otyryp, biryńǵai operator 2022 jylǵy 1 tamyzǵa deiin qurylady", - delingen habarlamada.
Sondai-aq, Almaty turǵyndarynyń shaǵymdary negizinde servis sapasyn arttyrý maqsatynda aqyly turaqtar jumysyn jetildirý úshin keshendi sharalar qabyldanatyny aityldy.
"Aldaǵy ýaqytta halyqaralyq tájiribeni qoldana otyryp, qalalyq turaq keńistigin damytý jáne kósheler men aýlalardy abattandyrý úshin aqyly turaqtardan túsetin túsimderdi paidalaný tujyrymdamasyn ázirleý josparlanýda. Sondai-aq, jinaqtalǵan problemalardy sheshý úshin qalada kóp deńgeili turaqtar salý basymdyqqa ie bolady.
Almatyda aqyly avtoturaq júiesi alǵash ret 2016 jyly engizildi. Joǵaryda atalǵan kompaniialardyń aqparaty boiynsha, aqyly turaqtardan qarjy ainalymy jylyna orta eseppen 1,4 mlrd teńgeni qurady", - deidi ákimdiktiń baspasóz qyzmeti.
Qazirgi ýaqytta kompaniia basshylaryna qatysty qylmystyq is qozǵalǵan jáne biýdjet qarajatyn urlaýmen bailanysty tergeý amaldary júrgizilip jatyr.
