Almatyda belgili túrkitanýshy, professor Rábiǵa Syzdyqtyń kóptomdyq shyǵarmalarynyń tusaýy kesildi, dep habarlaidy "Ult aqparat".
Ulttyq ǵylym akademiiasynyń akademigi, filologiia ǵylymynyń doktory, professor, Túrkiia «Dil Kurumu» lingvistikalyq akademiiasynyń qurmetti múshesi, Qazaqstan Respýblikasynyń eńbek sińirgen qairatkeri, QR Memlekettik syilyǵynyń, Shoqan Ýálihanov atyndaǵy syilyqtyń, I dárejeli «Barys» ordeniniń iegeri Rábiǵa Syzdyq biyl 95 jasqa toldy.
Osy mereitoiǵa orai Almatydaǵy Ulttyq kitaphanada ǵalymnyń 14 tomnan turatyn shyǵarmalary tanystyryldy.
Akademiktiń tiltanymdyq eńbekteri – latyn grafikasyna negizdelgen jańa ulttyq álipbige kóshý reformasynyń ǵylymi-teoriialyq, ǵylymi-ádistemelik jumystarynyń ózegi, irgetasy. Memleket basshysy Qasym-Jomart Toqaev Qazaqstan halqyna Joldaýynda «qazaq tili ultaralyq qatynas tiline ainalýy» tiistigi týraly aityp ótken tapsyrmasynyń oryndalýyna Rábiǵa Syzdyq eńbekteriniń qosar úlesi eleýli.
«Rábiǵa apai 1970-1980 jyldary ideologiia áli qatań, iaǵni túrkologiia, til tarihymen shuǵyldanýǵa bolmaityn kezde Baitursynovtanýdyń, Abaitanýdyń negizin qalady. Abaitanýdyń úlken sózdigin shyǵardy. Qoja Ahmet Iasaýi jóninde de irgeli eńbekter jazyp, Iasaýitanýdyń negizin sonaý 1980 jyldary qalady. Ol kezde dinge tyiym salynǵan tus bolatyn. 14 tomnan turatyn eńbegin jinaq etip shyǵarý jumysy birneshe jyl buryn bastalǵan edi. Aldaǵy ýaqytta basqa da eńbekteri shetinen qosyla beredi. Ár ǵalymnyń qoljazbalary, ár kezde jazǵan eńbekteri kóp. Degenmen, eńbekteriniń basym kópshiligi osy tańdamaly jinaqqa enip otyr. Rábiǵa apaiymyz qazir úlken arystarymyzdyń kózi bolyp esepteledi. Ony ana tilimizdiń – anasy dep aitamyz», - deidi A. Baitursynuly atyndaǵy Til bilimi institýtynyń direktory Erden Qajybek.
Shara QR Bilim jáne ǵylym ministrliginiń Ǵylym komiteti jáne A.Baitursynuly atyndaǵy Til bilimi institýtynyń uiymdastyrýymen ótti.
