Foto: gp28almaty.kz
Dárigerler kelinshektiń dárige allergiiasy bar-joqtyǵyn teksermesten emdeýge kirisken, dep jazady Qazaqparat.
Komaǵa túsken Tolqyn Ájibekovanyń kúieýi Ársen Dúisenbekovtyń aitýynsha, bul jaǵdai №28 emhananyń meditsina qyzmetkerleriniń salǵyrttyǵynan boldy.
– Áielim jótelip júrdi, keiin dárigerge qaralý úshin №28 emhanaǵa bardy. Biz "Jas qanat" shaǵynaýdanynda páter jaldap turamyz. Sondyqtan joldasym aldymen atalǵan meditsina mekemesine tirkeldi. Rentgenge tústi. Onda eki jaqty ókpeniń qabynýy anyqtaldy. Keiin dárigerler emhananyń kúndizgi statsionarynda inektsiia saldyryńyz dedi. Ne salǵanyn bilmeimiz. Medbikeler dárige allergiiasy bar-joǵyn teksermesten, eshqandai synamasyz tamshylatqyshty qoiǵan, – deidi Almaty turǵyny.
Aitýynsha, dárigerler der kezinde qajetti meditsinalyq kómek kórsete almaǵan.
– Osylaisha, áielim 3 maýsym kúni komaǵa tústi. Áli esin jiǵan joq. Jaǵdaiy aýyr. Qazir №4 aýrýhanada jatyr. Ózim baryp kórdim. Jasandy tynys alý apparatyna qosylǵan. Keshe, 8 maýsym týǵan kúni edi. 1979 jyly týǵan. Eki balamyz bar. Úlkeni 4 jasta, kishisi 2 jasta, – deidi komada jatqan Tolqyn Ájibekovanyń kúieýi.
Almaty qalalyq №28 emhanasy agenttikke bylai dep túsindirgen:
– Aita ketý kerek, patsientte jedel allergiialyq reaktsiia, iaǵni anafilaktikalyq shok negizgi preparat engizilgennen emes, synama retinde júrgizilgennen keiin paida boldy. Bul synama klinikalyq hattamalarǵa sáikes oryndaldy. Meditsina qyzmetkerleri jedel járdem brigadasy kelgenge deiin belgilengen standarttarǵa sáikes shuǵyl kómek kórsetti, – dep habarlady emhanadaǵylar.
Emhanadan málim etkendei, naýqas meditsinalyq protsedýralar júrgizýge kelisimin berip, aqparattandyrý paraǵyna qol qoiǵan.
– Onda ol dárilik zattarǵa allergiia baryn kórsetpegen. Bul meditsinalyq qyzmetkerler tarapynan táýekelderdi aldyn ala baǵalaýǵa kedergi keltirdi. Emhana naýqastyń jaqyn týystarymen bailanysta jáne onyń jaǵdaiy týraly aqparat oqiǵa bolǵan kúni berildi. Sondai-aq mekeme dialogqa ashyq jáne qoldanystaǵy zańnama aiasynda barlyq qajetti aqparatty týystaryna da, ýákiletti memlekettik organdarǵa da usyndy, – dep túsindirdi vedomstvodan.
Kelinshektiń joldasy Ársen Dúisenbekov atalǵan jaǵdaiǵa qatysty politsiiaǵa aryz jazǵan. Óz kezeginde Almaty qalalyq Politsiia departamenti tergeý amaldary bastalǵanyn málimdedi.
– Túrksib aýdandyq politsiia basqarmasynyń tergeý bólimi atalǵan derek boiynsha tergeý amaldaryn bastady. Qazir meditsinalyq jáne farmatsevtikalyq baqylaý komitetiniń Almaty qalasy boiynsha departamentine is materialdary joldandy. Olardyń uiǵarymy boiynsha, eger dárigerdiń qateligi dáleldenetin bolsa, QR Qylmystyq kodeksiniń 317-babyna sáikes qylmystyq is qozǵalyp, tiisti saraptamalyq zertteýler júrgiziletin bolady, – dep málimdedi Almaty qalalyq Politsiia departamentiniń resmi ókili Saltanat Ázirbek.
