Gazben júretin jańa avtobýstar megapolistiń qoǵamdyq kólik parkin tolyqtyrdy, dep habarlaidy «Ult aqparat».
Almaty ákimi Baqytjan Saǵyntaev Instagram paraqshasynda kommýnaldyq jáne qoǵamdyq kólikterdi júieli jańartý jáne ekologiialyq taza otynǵa kóshirý qalanyń ekologiiasyn jaqsartý jáne jolaýshylar tasymaly sapasyn arttyrý maqsatynda júzege asyrylatynyn aitty.
«Jolaýshy tasymaly salasy aitarlyqtai jańǵyrtyldy. Búgin ekologiialyq taza otynmen júretin 41 jańa avtobýs jolǵa shyqty. №45, 70 siiaqty baǵyttarda qatynaityn avtobýs parkin jańartamyz», - dep jazdy B.Saǵyntaev.
Syiymdylyǵy 90 adamǵa arnalǵan úsh esikti 12 metrlik jańa avtobýstarda múmkindigi shekteýli azamattarǵa arnalǵan jyljymaly platforma bar.
Avtobýstar beinebaqylaý, jolaýshy aǵynyn esepteitin avtomatty júie jáne júrgizýshiniń jaǵdaiyn baqylaityn datchikpen jabdyqtalǵan.
«Almatyelektrotrans» kommýnaldyq avtoparki barlyǵy 150 avtobýsty jetkizýge kelisimshart jasady. Qalǵan 109-y jaqyn arada jetkiziledi. Sondai-aq jeke tasymaldaýshylar 83 avtobýs,sonyń ishinde 38 elektrobýs satyp alýdy josparda. Osylaisha, biyl jolaýshylar tasymaly parki 233 ekologiialyq taza kólikpen jańartylady.
Jalpy qalada 20 avtobýs parki jumys isteidi. Onda 147 baǵyt boiynsha qatynaityn 1940 birlik avtobýs bar. Onyń 393-i gazben, 14 toqpen, 1000-astamy dizel otynymen júredi. Sondai-aq,160 trolleibýs qatynaidy.
