«Almaty» ÁKK» AQ-nyń enshiles uiymy «Almaty Finance» JShS jańa stýdentter jataqhanasynyń qurylysyn salý úshin «BAZA 271» JShS-ne jeńildetilgen qarjylandyrý usyndy, dep habarlaidy ult.kz.
Jobany júzege asyrýǵa «Almaty Business – 2025» baǵdarlamasy aiasynda jyldyq 6% mólsherlememen, 7 jyl merzimge 500 mln teńge bólindi.
Joba Almatynyń bilim berý infraqurylymyn damytýǵa, stýdentterdi zamanaýi ári jaily turǵyn úimen qamtamasyz etýge jáne stýdenttik jataqhanalardaǵy oryn tapshylyǵyn azaitýǵa baǵyttalǵan.
Jalpy aýdany 3 537,2 sharshy metr bolatyn jańa jataqhana 400 orynǵa eseptelgen. Ǵimarat tórt qabattan jáne jertóle qabatynan turady. Munda Almatydaǵy joǵary oqý oryndarynyń stýdentteri tura alady.
Jobanyń jalpy quny 750 mln teńge. Onyń ishinde 250 mln teńge – investordyń óz qarajaty, al 500 mln teńge – «Almaty Finance» JShS usynǵan qaryz qarajaty. Sonymen qatar joba Qazaqstan Respýblikasy Ǵylym jáne joǵary bilim ministrliginiń «Qarjy ortalyǵy» AQ arqyly memlekettik sýbsidiialaý tetigimen júzege asyrylady. Sýbsidiia mólsheri – jataqhanada turatyn árbir stýdentke 230 AEK.
Jataqhanada turýdyń josparlanǵan quny – bir stýdentke aiyna 45 myń teńge.
