Almaty ákimdigi 25 mamyrdan bastap barlyq dámhana, meiramhana, HQO-lardy ashýdy josparlap otyr. Bul týraly qalalyq kásipkerlik jáne investitsiialar basqarmasy basshysynyń orynbasary Qanat Saǵyndyqov aitty, dep habarlaidy QazAqparat.
«18 mamyrdan bastap týrizm, uialy bailanystyń abonenttik bólimderi, bank bólimsheleri, qarjy sektory tolyq ashyldy. 25 mamyrdan bastap karantin rejimin bosańsytý aiasynda qaladaǵy barlyq saýda úilerin, saýda oiyn-saýyq ortalyqtaryn ashýdy josparlap otyrmyz. Qalada osyndai 140 nysan bar eken. Sonymen qatar, meiramhana, dámhanalar da ashylady», - dedi ol.
Onyń aitýynsha, mundai mekemelerde kelýshilerdiń sanyna qatysty shekteý joq.
«Eń bastysy - sanitarlyq talaptar tolyq oryndalýy tiis. Ústelderdiń arasy 2 metrden kem bolmaýy kerek. Bir ústelge bir otbasynyń 4 adamy ǵana otyrǵany abzal. Qoǵamdyq tamaqtaný oryndary 23:00-ge deiin ǵana ashyq turady. Biraq banket, toi jasaýǵa tyiym salynady»,- deidi ol.
Sondai-aq, Almatyda osy ýaqytqa deiin sanitarlyq talaptarǵa sai kelmegen soń jabyq turǵan azyq-túlik bazarlary da ashylady.
«Bul ashyq tiptegi bazarlarda túsindirý jumystary júrgizildi. Senbi kúni aýdit bolady. Odan bólek qaladaǵy barlyq qonaq úiler, HQO ashylady», - deidi basqarma basshysynyń orynbasary.
Aýdit aýdany 500 sharshy metrden asatyn nysandarda ǵana júrgiziledi.
«Qalalyq taýarlar men qyzmetterdiń sapasy men qaýipsizdigin baqylaý departamenti aýdany 500 sharshy metrden asatyn saýda oryndaryna qatysty talaptardy jariialady. InfoAlmaty.kz saitynda bári jazylǵan», - dedi Qanat Saǵyndyqov.
Onyń aitýynsha, birinshi kezeńde saýda oiyn-saýyq ortalyqtarynda býtikter, meiramhanalar, himtazalaý ashylady. Ekinshi kezeńde - qoǵamdyq tamaqtaný oryndary, iaǵni fýdkort, úshinshi kezeńde - kinoteatrlar, oiyn-saýyq alańdary ashylady.
