Almaty oblysynda 22 jastaǵy boijetken Anastasiia Galeevanyń ólimine kúdiktiler sottaldy, dep habarlaidy QazAqparat.
Sot aldynda 27 jastaǵy Evgenii Stepanov pen 25 jastaǵy Ashat Barjaqsin jaýap berdi. Sýdia Evgenii Stepanovty QR QK 99-baby 1-bólimi boiynsha aiypty dep taýyp, 12 jylǵa bas bostandyǵynan aiyrý týraly úkim shyǵardy. Ol jazasyn qatań rejimdegi túzeý mekemesinde óteidi.
Al Ashat Barjaqsin QR QK 432-baby boiynsha aiypty dep tanylyp, 4 jylǵa bas bostandyǵynan aiyryldy. Ol jazasyn qaýipsizdigi orta deńgeidegi túzeý mekemesinde óteitin boldy.
«Osyndai jaǵdaiǵa tap bolamyn degen oi úsh uiyqtasam túsime kirgen emes. Anastasiia tirilip kelmeidi, ony jaqsy túsinip turmyn. Bulai bolǵany óte ókinishti. Bar yqylasymmen týystarynan keshirim suraimyn. Bul jaǵdaiǵa men ǵana jaýaptymyn. Qamaýda otyrǵanda kóp nárseni oilandym. Ómirlik qundylyqtarymdy qaita zerdeledim. Meni bas bostandyǵymnan aiyrmaýyńyzdy suraimyn. Men jábirlenýshilerdiń aldyndaǵy mindetterimdi oryndaýym kerek», - dedi Ashat Barjaqsin.
Aita ketý kerek, 22 jastaǵy qyz aqpannyń 9-nan 10-na qaraǵan túni Almaty oblysy Jańa Qýat kottedj qalashyǵyndaǵy qurbysynyń úiine shash úlgisin jasaýǵa baryp, sodan úiine oralmaǵan. Anastasiia qurbysynyń úiinen tún ishinde, saǵat 23:30-da shyqqan.
Oqys oqiǵadan soń qyzdy izdeý sharalaryna 50 erikti, kinologtar, politsiia qyzmetkerleri kiristi. 2 aidan soń politsiia qyzdyń denesin Ile aýdanyndaǵy Mejdýrechinsk aýylyna jaqyn mańdaǵy kanaldyń shliýzinen tapty.
Aldyńǵy sot otyrysynda prokýror Marat Qasymov istiń mán-jaiyn aityp bergen bolatyn.
