الماتى وبلىسىندا 22 جاستاعى بويجەتكەن اناستاسييا گالەەۆانىڭ ٶلٸمٸنە كٷدٸكتٸلەر سوتتالدى, دەپ حابارلايدى قازاقپارات.
سوت الدىندا 27 جاستاعى ەۆگەنيي ستەپانوۆ پەن 25 جاستاعى اسحات بارجاقسين جاۋاپ بەردٸ. سۋديا ەۆگەنيي ستەپانوۆتى قر قك 99-بابى 1-بٶلٸمٸ بويىنشا ايىپتى دەپ تاۋىپ, 12 جىلعا باس بوستاندىعىنان ايىرۋ تۋرالى ٷكٸم شىعاردى. ول جازاسىن قاتاڭ رەجٸمدەگٸ تٷزەۋ مەكەمەسٸندە ٶتەيدٸ.
ال اسحات بارجاقسين قر قك 432-بابى بويىنشا ايىپتى دەپ تانىلىپ, 4 جىلعا باس بوستاندىعىنان ايىرىلدى. ول جازاسىن قاۋٸپسٸزدٸگٸ ورتا دەڭگەيدەگٸ تٷزەۋ مەكەمەسٸندە ٶتەيتٸن بولدى.
«وسىنداي جاعدايعا تاپ بولامىن دەگەن وي ٷش ۇيىقتاسام تٷسٸمە كٸرگەن ەمەس. اناستاسييا تٸرٸلٸپ كەلمەيدٸ, ونى جاقسى تٷسٸنٸپ تۇرمىن. بۇلاي بولعانى ٶتە ٶكٸنٸشتٸ. بار ىقىلاسىممەن تۋىستارىنان كەشٸرٸم سۇرايمىن. بۇل جاعدايعا مەن عانا جاۋاپتىمىن. قاماۋدا وتىرعاندا كٶپ نەرسەنٸ ويلاندىم. ٶمٸرلٸك قۇندىلىقتارىمدى قايتا زەردەلەدٸم. مەنٸ باس بوستاندىعىمنان ايىرماۋىڭىزدى سۇرايمىن. مەن جەبٸرلەنۋشٸلەردٸڭ الدىنداعى مٸندەتتەرٸمدٸ ورىنداۋىم كەرەك», - دەدٸ اسحات بارجاقسين.
ايتا كەتۋ كەرەك, 22 جاستاعى قىز اقپاننىڭ 9-نان 10-نا قاراعان تٷنٸ الماتى وبلىسى جاڭا قۋات كوتتەدج قالاشىعىنداعى قۇربىسىنىڭ ٷيٸنە شاش ٷلگٸسٸن جاساۋعا بارىپ, سودان ٷيٸنە ورالماعان. اناستاسييا قۇربىسىنىڭ ٷيٸنەن تٷن ٸشٸندە, ساعات 23:30-دا شىققان.
وقىس وقيعادان سوڭ قىزدى ٸزدەۋ شارالارىنا 50 ەرٸكتٸ, كينولوگتار, پوليتسييا قىزمەتكەرلەرٸ كٸرٸستٸ. 2 ايدان سوڭ پوليتسييا قىزدىڭ دەنەسٸن ٸلە اۋدانىنداعى مەجدۋرەچينسك اۋىلىنا جاقىن ماڭداعى كانالدىڭ شليۋزٸنەن تاپتى.
الدىڭعى سوت وتىرىسىندا پروكۋرور مارات قاسىموۆ ٸستٸڭ مەن-جايىن ايتىپ بەرگەن بولاتىن.
