17 tamyzdan bastap Almatyda kóptegen kásipkerlik sýbektilerdiń jumysy qaita jandanady, dep habarlaidy "Ult aqparat".
Almaty qalasynyń bas memlekettik sanitar dárigeri Jandarbek Bekshiniń aitýynsha, osy ýaqytqa deiin qyzmetine tyiym salynǵan nysandar dúisenbiden bastap jumysyn qaita bastaidy.
«17 tamyzdan bastap saýda ortalyqtary, saýda jelileri men ashyq bazarlar jumys istei bastaidy. Sondai-aq, sán salony men ortalyqtarynyń, shashtarazdardyń, SPA-ortalyqtarynyń jumysyna ruqsat etiledi. Balalarǵa arnalǵan túzetý kabinetteri, bilim berý ortalyqtary aldyn ala jazylý boiynsha jumys isteidi. Aita ketý kerek munda adam sanyna shekteý qoiylǵan. Iaǵni, 5 kelýshiden artyq qabyldaýǵa bolmaidy«», – deidi Jandarbek Bekshin.
Sondai–aq, dúisenbiden bastap ashyq aspan astyndaǵy attraktsiondarǵa ashylýǵa ruqsat berildi. Munda da barylyq sanitariia talaby saqtalýy tiis. Áleýmettik qashyqtyqty saqtaý, kelýshiler aǵynyn retteý jáne mindetti túrde maska taǵý qajet.
«Sportpen shuǵyldanýǵa ruqsat etildi. 30 adamnan aspaityn ulttyq qurama komandalarǵa jattyǵý ótkizýge bolady. Munda joǵaryda atalǵan sanitarlyq talapty saqtaý qajet», - deidi ol.
Sonymen qatar, almatylyqtarǵa saiabaqtarǵa, alańdarǵa, jaǵalaýǵa, barýǵa bolady. Biraq 1 metrlik áleýmettik qashyqtyqty qadaǵalaý kerek.
