Almatyda 16386 otbasy memlekettik járdemaqy alady, bul týraly Eńbek, áleýmettik qorǵaý jáne kóshi-qon komitetiniń Almaty qalasy boiynsha departamentiniń bastyǵy Aidynjan Narmatov aitty, dep habarlaidy "Ult aqparat".
«Almatyda 16386 kópbalaly otbasy memlekettik járdemaqy alady. Búgingi kúnge deiin 9000-nan astam otbasyǵa 411 million teńge tólendi. 15 qańtarǵa deiin barlyq adamdarǵa járdemaqy tóleý josparlanǵan», - deidi Aidynjan Narmatov.
Onyń aitýynsha, ótken jyly járdemaqy taǵaiyndaý úshin otbasynyń tabys kirisi eskerilgen.
«2019 jyly járdemaqy otbasynyń kirisine bailanysty taǵaiyndalatyn. Jańa jyldan bastap kiris esepke alynbaidy. Iaǵni, eger otbasynda 4 nemese odan kóp bala bolsa, onda bul otbasyna tabysyna qaramastan ai saiynǵy járdemaqy alýǵa kepildik beriledi. Olardyń mólsheri balalardyń sanyna bailanysty bolady», - dedi ol.
Sondai-aq, ol AÁK-ti kimder alatynyn aitty.
«Az qamtylǵan otbasylardy anyqtaityn eń tómengi kúnkóris sheginen 70 paiyzdyq ólshemshart sol kúii qalady. Otbasynyń árbir múshesine AÁK mólsheri buǵan deiingidei otbasynyń jan basyna shaqqandaǵy ortasha kirisi men eń tómengi kúnkóris sheginiń 70 paiyzy arasyndaǵy aiyrma retinde anyqtalady», - dep qorytyndylady Aidynjan Narmatov.
