Almaty qalasynda bir táýlikte 3 423 adam koronavirýsqa qarsy vaktsina saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaidy QazAqparat.
«18 qarasha kúni 3 423 almatylyq vaktsina saldyrdy. Koronavirýsqa qarsy ekpeniń I komponentin – 1 874, II komponentin – 1 549 adam aldy. Vaktsina saldyrǵandar sany boiynsha Almaty qalasy aldyńǵy orynda. Biylǵy jyldyń 1 aqpany men 18 qarasha aralyǵynda qalada 1 015 141 turǵyn vaktsinanyń birinshi komponentin, 967 790 adam ekinshi komponentin saldyrǵan. Onyń ishinde 121 739 adamnyń jasy 60-tan asqan», - dep habarlady basqarmadan. Qalada 132 pýnkt jumys istep tur. 733 adamnan turatyn 205 ekpe brigadasy bar.
«Qazir meditsina uiymdarynda, mektepterde, mádeniet, sport obektilerinde, bazarlar men qalanyń SOSO-da vaktsinatsiia pýnkti jumys isteidi», - dep naqtylady densaýlyq saqtaý basqarmasynyń baspasóz qyzmeti.
