QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev karantin rejimine qalai monitoring júrgizilip jatqanyn aitty, dep habarlaidy QazAqparat.
«Óńirlerdiń ákimdikteri QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń aýmaqtyq departamentterimen jáne quqyq qorǵaý organdarymen birge monitoring toptaryn qurǵan bolatyn. Onyń maqsaty – epidemiiaǵa qarsy jáne karantin sharalaryn baqylaýdy qamtamasyz etý. 5-14 shilde aralyǵynda aimaqtyq monitoring toptary karantin ýaqytynda jumys istep turǵan 16 572 nysandy tekserdi. Zańbuzýshylyqqa jol bergen 1 617 nysan anyqtaldy.
Aita keterligi, nysandarǵa tekserýge alǵash barǵan kezde tájiribe esepke alynyp, infektsiialyq aýrýlarǵa qarsy sanitarlyq jáne aǵartý jumysyna basa mańyz beriledi. Monitoring toptary osy rette eń aldymen túsindirý jumystaryna basa den qoidy», - dedi Timýr Sultanǵaziev OKQ-da ótken baspasóz máslihatynda.
Monitoring toptarynyń jumysynyń nátijesinde eskertýler boiynsha kemshilikterdi túzegenge deiin 564 uiym jumysyn óz erikterimen toqtatqan.
«QR ÁQBK-nyń 425-babynda qarastyrylǵan zańdy buzǵany úshin 5 shildeden beri 225 hattama toltyryldy. Máselen saýda nysandarynda, qoǵamdyq tamaqtaný oryndarynda erejeler jii buzylyp jatady. Atap aitqanda adamdar maska kimeidi, áleýmettik qashyqtyq saqtalmaidy, termometriia júrgizilmeidi», - dedi ol.
Mysaly Aqmola oblysynda aýmaǵy 500 sharshy metrlik saýda nysany ruqsat bolmaǵanyna qaramastan jumysyn jalǵastyra bergen. Onyń iesine 638 myń teńge aiyppul salynǵan. Sol sekildi Semeide «Álem» saýda úii men «Voshod» bazaryna karantin ýaqytynda jumys júrgizgeni úshin ielerine aiyppul salynǵan. Qostanai oblysynda karantin ýaqytynda jumysyn jalǵastyrǵan saýda nysanyndaǵy personalda maska da, meditsinalyq qolǵap ta, antiseptik te bolmaǵan. Almatyda ujymdyq banketterdi anyqtaý barysynda ótkizilmeýi tiis toidyń bolyp jatqany anyqtalǵan. Oǵan 100 adamǵa jýyq adam qatysqan. Osyǵan bailanysty toihana iesine aiyppul salynǵan.
