Foto: Almaty qalasy ákimdigi
Búgin kórnekti akter, rejisser, Qazaq KSR jáne KSRO halyq ártisi Asanáli Áshimovpen qoshtasý rásimi ótti. Halyq artisi Abai atyndaǵy qazaq ulttyq opera jáne balet teatrynan sońǵy saparǵa attandy, dep habarlaidy Ult.kz.
Jiynda Memlekettik keńesshi Erlan Qarin Prezident Qasym-Jomart Toqaevtyń kóńil aitý jedelhatyn oqydy.
«Asanáli Áshimov búkil sanaly ǵumyryn teatr jáne kino salasyna arnap, tól mádenietimizdiń kókjiegin keńeitýge ólsheýsiz úles qosty. Ol kóptegen obrazdy sheber somdap, kórermen qaýymnyń ystyq yqylasyna bólendi. Sahna sańlaǵy ári kásibi kinoger retinde sońyna óshpes iz qaldyrdy. Jas ónerpazdarǵa baǵyt-baǵdar berip, rýhani sabaqtastyqtyń saqtalýyna zor eńbek sińirdi. Óreli ónerdiń týyn biik ustap, ónegeli ǵumyr keshken Asanáli Áshimovtiń jarqyn beinesi halqymyzdyń júreginde saqtalady. Imany salamat, jany jannatta bolsyn!», — delingen jedelhatta.
Qaraly jiynǵa qatysqan Almaty ákimi Darhan Satybaldy Asanáli Áshimovpen birneshe sharada kezdeskenin jáne oryndalmai qalǵan oi-nieti týraly da aitty.
«90 jyldyq mereitoiyn Almaty boiynsha ǵana emes, búkil Qazaqstan kóleminde mádeni merekege ainaldyramyz degen josparymyz bolǵan edi. Ókinishke qarai, Allanyń jospary basqa eken. Amal qansha», — dedi qala ákimi.
Qoshtasý rásimine mádeniet jáne óner salasynyń ókilderi, qoǵam qairatkerleri, marqumnyń áriptesteri, shákirtteri jáne qala turǵyndary kóptep jinaldy.
Aita keteiik, Asanáli Áshimov 21 jeltoqsan kúni 89 jasqa qaraǵan shaǵynda ómirden ótti. Halyq artisi «Keńsai-1» ziratyna jerlenedi.
