Búgin Almatyda «Jumys isteitin jastar úshin satyp alý quqyǵynsyz jalǵa beriletin turǵyn úi» baǵdarlamasy boiynsha qujattardy qabyldaý bastaldy. Bul týraly brifing barysynda qalalyq Turǵyn úi saiasaty basqarmasy basshysynyń orynbasary Ermek Ámirov málim etti, dep habarlaidy QazAqparat.
Spiker baǵdarlamaǵa qatysý sharttary týraly aitty.
«Eń aldymen, ótinish berýshiler ETsQ kiltin alýy qajet, tiisti anyqtamalardy ótinim bergen sátte usyný kerek. Qujattar tizimin myna saittan https://almaty-jastary.info/ tabýǵa bolady. Sol jerde ótinimderdi qabyldaý júzege asyrylady. Qujattardy tapsyrǵandar arasynda irikteý baldyq júie boiynsha júrgiziledi. Qabyldaý biylǵy 20 qarashada saǵat 23.59-da aiaqtalady. Búkil protsess avtomattandyrylǵan jáne tek saitta júredi, sondyqtan kómek usynatyn beitanys adamdarǵa senbegen jón»,- deidi Ermek Ámirov.
Baǵdarlama aiasynda turǵyn úi tek 5 jylǵa beriledi, ony 29 jasqa deiingi jumys isteitin jastar ǵana alady. Osy ýaqyt ishinde jeke turǵyn úi satyp alýǵa nemese bastapqy jarnaǵa jinaqtaý usynylady. Turǵyn úi úshin ai saiynǵy jaldaý aqysy 9-10 myń teńge.
«Ótinimdi balalary bar otbasylar bere alady. Bul rette keminde sońǵy eki jylda Almaty qalasynda turaqty tirkeý talap etiledi. Sondai-aq, úmitkerlerde QR aýmaǵynda sońǵy 2 jylda baspanasy bolmaýy tiis. Olardyń ai saiynǵy jalaqysy jumystyń sońǵy 6 aiynda 40 AEK-ten joǵary bolýy kerek – 116 680 teńge», - deidi spiker.
Baǵdarlamaǵa qatysatyn úmitkerlerge mamandyqtar boiynsha talaptar joq, sondai-aq biýdjettik jáne memlekettik qyzmetshilerden basqalary da ótinim bere alady.
«Jumys isteitin jastar úshin satyp alý quqyǵynsyz jalǵa beriletin turǵyn úi» baǵdarlamasy QR Tuńǵysh Prezidentiniń bastamasymen 2019 jyly bekitilip, sol kezde 1050 jas jaldamaly sharshy metrdi aldy. 2020 jyly taǵy 350 adam qonystandy, jyl sońyna deiin ákimdik Naýryzbai aýdanynyń «Alma Siti-5» jáne Alataý aýdanynyń «Mádeniet» jańa turǵyn úi keshenderinde 1050 bir bólmeli páterdi jalǵa beredi», - deidi ol.
