Qazaqstannyń Premer-ministri Asqar Mamin Almaty oblysynynyń shekarasyn ózgertý jónindegi Qaýlyǵa qol qoidy. Endi óńirge tiesili bolǵan jalpy aýmaǵy 1 091,78 gektar jer Jambyl oblysyna beriledi.
"Almaty oblysyndaǵy jalpy aýmaǵy 1 091,78 gektar bolatyn jerdi Jambyl oblysynyń Qordai aýdanyna qosý arqyly shekarany ózgertý kerek", - dep jazylǵan elektrondy úkimet saitynda jariialanǵan aqparatta.
Osylaisha, QR qorǵanys ministrliginiń aýdandyq gvardiialyq eksplýatatsiialyq bólimi, Biologiialyq qaýipsizdik problemalaryn ǵylymi-zertteý institýty jáne burynǵy "Almaty" áskeri sovhozy syndy nysandary Jambyl oblysyna beriledi.
Shekarany josparlaý kezinde "Almaty" sovhozynyń turǵyndary memlekettik qyzmetti Uzynaǵash aýylyna baryp alǵany aityldy. Ol sovhozdan 150 shaqyrym jerde ornalasqan. Jer Jambyl oblysyna berilgen soń halyqqa qyzmet kórsetý ortalyqtary áldeqaida jaqyndai túspek. Endi qajetti qujatty alý úshin turǵyndar 80 shaqyrym jerdegi Qordai aýdanynyń ortalyǵyna barady.
Almaty oblysy 1932 jyldyń naýryz aiynda qurylǵan bolatyn. 2001 jylǵa deiin oblys ortalyǵy - Almaty qalasy boldy. 2001 jyldyń sáýir aiynan bastap ortalyq Almatydan Taldyqorǵanǵa kóshirildi. 2018 jyldyń 1 jeltoqsanyndaǵy málimet boiynsha óńir halqy eki millionnan asady.
Qazir Jambyl oblysynyń aýmaǵy 144 264 sharshy shaqyrym. Jańa aýmaq qosylǵan soń, ol 145 355 sharshy shaqyrymǵa deiin ulǵaiady.
