Murat Sabdyrov. Týystary usynǵan foto, Tengrinews.kz
Almaty turǵyny politsiia bóliminiń kamerasynda asylyp qalǵan, - dep habarlaidy Tengrinews.kz tilshisi.
Oqiǵa biyl qańtardyń aiaǵynda Almaly aýdandyq politsiia bóliminde bolǵan. Áleýmettik jelilerde bolǵan jáittýraly marqumnyń týysy Arman Sabdyrov aityp berdi. Er adamnyń aitýynsha, politsiia qyzmetkerleri 27 qańtarda onyń 33 jastaǵy inisi Murat Sabdyrovtan jaýap alǵan.
"Sol kúni saǵat 11.00 shamasynda Murat maǵan qońyraý shalyp, ony Bostandyq aýdanynyń Politsiia basqarmasyna alyp ketkenin aitty. Onda ol qyzynyń shaǵymy boiynsha túsken. Olardyń arasynda másele boldy. Olar shamamen bir jyl kezdesti. Ol kelýimdi ótindi jáne qyzdyń týystarynan qorqatynyn aitty. Biraq sodan keiin qońyraý shalyp, kelmei-aq qoiýymdy, túsinikteme jazǵannan keiin tez arada bosatatynyn aitty", - dedi Arman Sabdyrov.
Onyń aitýynsha, biraz ýaqyttan keiin Murat telefon kótermegen, bailanysqa shyqpaǵan. Sondyqtan aǵasy aýdandyq Politsiia basqarmasyna barǵan.
"Onda Murat Alataý aýdanynyń Politsiia basqarmasynda ekenin aitty. Sonda bardym, biraq ol jerde de bolmady. Muratty Almaty, Bostandyq jáne Alataý aýdandyq Politsiia departamentiniń kezekshi bóliminen izdedim, biraq nátije bolmady.
Keiin ony túski ýaqytta Almaly aýdandyq Politsiia bólimine alyp ketkeni belgili boldy. Jolda maǵan ózin Murattyń dosymyn dep tanystyrǵan Qýat esimdi beitanys adam habarlasty. Ol Muratpen birge sol bólimde bolǵanyn, biraq qazir shyqqanyn aitty. Qýat inim maǵan qońyraý shalyp, ony shuǵyl túrde sol jerden shyǵaryp alýyn suraǵanyn aitty. Óitkeni oǵan qatty qysym jasalyp jatqanyn jetkizdi", - dedi ol.
Onyń aitýynsha, Almaly aýdandyq PB kezekshi bóliminde oǵan Murattan jaýap alynyp jatqany týraly aitylǵan. Sondyqtan oǵan kirgizbegen.
"Olar kútýdiń esh paidasy joq ekenin, tańerteń kelý qajet ekenin aitty. Uzaq ýaqyt boiy qandai da bir aqparat alýǵa tyrystym. Muratty kórýge nemese tergeýshimen sóilesýge tyrystym, biraq nátijesiz boldy. Meni eshkim tyńdamady.
Tańerteńge deiin Murat úige oralmady, men birden advokat izdei bastadym. Alaida túske jaqyn politsiia bóliminiń mańynda turyp, tergeýshige taǵy bir ret kirýge tyrysqan sátte jienim qońyraý shaldy. Ol Murattyń telefonynan politsiia qyzmetkerleri habarlasqanyn jáne inim túnde kamerada asylyp qalǵanyn aitty. Estigennen keiin aiǵailap, ǵimaratqa kirdim, biraq olar meni kirgizbedi. Jas jigit shyǵyp, ózin Politsiia bóliminiń bastyǵymyn dep tanystyryp, inimniń denesin máiithanadan alýǵa bolatynyn aitty", - dedi ol.
Sodan keiin Arman Sabdyrov inisiniń denesin máiithanadan alyp ketken. Alaida ol kórgenderinen qatty shoshyp ketkenin aitty.
"Denesinde, qolynda, tyrnaǵynda, shyntaǵynda, aiaǵynda, arqasynda, moinynda kógergen dene jaraqattary boldy. Úlken saýsaqtary kógerip ketken. Synǵan sekildi, tizesi isip turdy. Jaraqatty sanaý múmkin emes. Inimdi aiaýsyz azaptap, ózi-ózine qol jumsaýǵa jetkizgenine kúmánim joq. Saý-tamtyǵy qalmaǵan. Politsiia saý kúiinde áketip, kelesi kúni denesin berdi. Men kez kelgen nusqany joqqa shyǵarmaimyn", - dedi ol.
Onyń aitýynsha, Murat Sabdyrov munai-gaz salasynda jobalaýshy bolǵan, óziniń firmasy bolǵan jáne basqa da kompaniialardy basqarǵan. Ol aǵasynyń "kásipkerlik qyzmetpen belsendi ainalysqanyn, úlken josparlary bolǵanyn, sportpen ainalysqanyn, dostarynyń arasynda bedelge ie bolǵanyn" aitty.
"Onyń ómirmen qosh aitysqysy kelmegenin jaqsy bilemin. Jeksenbide biz Muratty aqtyq saparǵa shyǵaryp saldyq. Aýyr qaiǵyny aityp jetkize almaimyn. Beisenbide inim tiri ári deni saý boldy", - dep tolyqtyrdy ol.
Arman Sabdyrov bolǵan oqiǵadan beri bes kún ótkenin aitty. Alaida, onyń aitýynsha, áli kúnge deiin eshkim Bostandyq PB men Almaly APB-de ne bolǵanyn túsindirýge tyryspaǵan.
"Eger Murat birdeńege kináli bolsa, ony aqtamaimyn jáne kináli bolǵan jaǵdaida barlyq kináli adam zańǵa sáikes qatań jazalanýy kerek dep sanaimyn. Biraq sotqa deiingi tergep-tekserý satysynda azaptaýǵa jol berilmeidi.
Biz máiittiń táýelsiz saraptamasyn júrgizgen joqpyz, óitkeni jalpy tergeýge senip, úmittendik. Búgin osy ispen Almaly aýdanynyń PB ainalysatynyn bildim, onda belgisiz jaǵdaida inim qaitys boldy. Quqyq qorǵaý organdary tarapynan oqiǵaǵa qandai da bir túsinik berilmedi, onyń ústine jaqyn týystarynyń eshqaisysy is boiynsha jábirlenýshi retinde tanylmady", - dep túiindedi ol.
Sonymen qatar, Almaty Politsiia departamenti ókili bolǵan oqiǵa týraly aityp berdi. Quqyq qorǵaý organdarynyń málimetinshe, Murat Sabdyrov toptyq zorlaý deregine qatysty degen kúdikpen ustalǵan.
"Bul týraly ótinishpen 27 qańtarda 34 jastaǵy azamat júgindi. Qyzdyń aitýynsha, beitanys adam ony Saialy yqshamaýdanyndaǵy páterinde tórt kún boiy májbúrlep ustap, birneshe ret qorlaǵan. Budan ári ótinish berýshi 25 qańtarda Sabdyrov dosymen birge Almaly aýdanyndaǵy jaldamaly páterge alyp kelip, aiaýsyz uryp-soǵyp, birneshe ret zorlaǵanyn aitty", - dedi politsiia qyzmetkeri.
Qyzdyń aryzy Qylmystyq kodekstiń 120-babynyń 2-bóligi boiynsha sotqa deiingi tergep-tekserýdiń biryńǵai tiziliminde tirkeldi.
"Osy qylmysty jasady degen kúdikpen Sabdyrov pen 40 jastaǵy er adam ustaldy. Almaly aýdandyq politsiia bóliminiń kamerasynda bolǵan kezde ustalǵanyna eki saǵat ótken soń, Sabdyrov jeidesiniń jeńimen asylyp, óz-ózine qol jumsady. Oqiǵa beinebaqylaý kamerasyna túsip qalǵan", - dedi politsiia qyzmetkeri.
Bul derek boiynsha sotqa deiingi taǵy bir tergeý bastaldy. Oqiǵanyń mán-jaiy anyqtalyp jatyr.
