Búgin Almaty qalasynyń jańa ákimi Baqytjan Saǵyntaev Instagram, Facebook jáne Twitter áleýmettik jelilerine tirkeldi, dep habarlaidy "Ult aqparat".
Qala basshysy óziniń áleýmettik jelidegi alǵashqy jazbasyn Almaty qalasynyń turǵyndaryna arnady.
«Qurmetti almatylyqtar! Búgin sizdermen tikelei bailanysta bolý úshin Facebook, Instagram jáne Twitter akkaýnttaryn ashtym. Sizdermen dialogqa daiynmyn!», - dep jazdy Baqytjan Saǵyntaev.
Almatylyqtar jańa ákimdi qyzmetimen quttyqtap, óz oilary men usynystaryn jetkizdi.
Jańa ákimge kelip túsken usynystardyń basym bóligi ál-Farabi dańǵylynda ruqsat etilgen saǵatyna 80 shaqyrym jyldamdyqty qaitarý boldy. Azamattardy qorshaǵan ortany qorǵaý, avtomobil joldary, qoǵamdyq kólik, qalalyq aýdandardy damytý jáne kommýnaldyq máseleler alańdatady.
Eki saǵat ishinde Baqytjan Saǵyntaevtyń Instagram paraqshasyna turǵyndar 500-ge jýyq pikir qaldyrdy.
Eske salaiyq, 28 maýsymda Memleket basshysynyń Jarlyǵymen Baqytjan Saǵyntaev Almaty qalasynyń ákimi bolyp taǵaiyndaldy.
