Almatyda barlyq problemalyq ýchaskelerdi aralaý barysynda 600-den astam jumys istemeitin kóshe jaryǵy anyqtaldy, dep habarlaidy "Ult aqparat".
Almaty ákiminiń aitýynsha, qalany jaryqtandyrý jóninde taraǵan aqparattan soń qalalyqtardan oryn alǵan kemshilikter týraly kóptegen habarlama kelip túsken.
«Kei jerlerge baǵanalar ornatylǵanymen, shamdar ilinbegen, kei jerlerde jaryq janbaidy. Ótken aptada barlyq problemaly ýchaskelerdi aralaǵan kezde 622 isten shyqqan jaryq kózi anyqtaldy.
Búgingi kúni 529 sham jóndeldi. Áleýmettik jelilerdegi bizdiń resmi akkaýntarymyzǵa kelip túsken azamattardyń ótinishteri boiynsha jańa jaryq núktelerin tartý baǵyttaryna monitoring júrgizilýde», - dep jazdy Baqytjan Saǵyntaev Instagram-daǵy paraqshasynda.
Sondai-aq, qala basshysy baqylaýdy kúsheitip, kúndelikti monitoring júrgizýdi jalǵastyratyndaryn atap ótti.
«Megapolistiń tynys-tirshiliginiń barlyq salalaryna jaýapkershiligi mol qyzmet kórsetýshiler qajet. Qalalyqtarǵa shahardy abattandyrýǵa qatysqandary úshin alǵys bildiremin», - dedi ol.
