Kóliktegi oqiǵalar men intsidentterdi tekserý departamentiniń direktory Bolat Naýryzáliev 2019 jylǵy 27 jeltoqsanda Almaty qalasy áýe ailaǵynyń aýmaǵynda Bek Air áýe kompaniiasynyń Fokker-100 áýe kemesine qatysty oryn alǵan aviatsiialyq oqiǵany tekserýdiń qorytyndysy boiynsha túsinikteme berdi, dep habarlaidy QazAqparat.
«Ekipaj aýa raiynyń málimetterin alǵan soń. ushaqtyń ishki-syrtqy jaǵdaiyn qaraidy. Aman qalǵan ekinshi ushqysh ushaqty ózi qarap shyqqanyn aitady. Onyń sózimen aitsaq, ushaq qanatyn ustap kórgende «temirdei qurǵaq» bolǵan. «Temirdei qurǵaq» degen sózdiń qai maǵynada qoldanǵanyn bilmeimin, biraq týra osylai aitqan.
Iaǵni, komandir ushaqtyń qanatyn óńdemeý kerek dep sheshken. Tańǵy saǵat 6.30 kezi bolǵan. Ol kezde kún qarańǵy bolýy da múmkin. Olar qanat qurǵaq dep eseptegen bolýy múmkin», - dedi Bolat Naýryzáliev Indýstriia jáne infraqurylymdyq damý ministriliginde ótken brifingide.
Mamannyń aitýynsha, halyqaralyq tájiribede №96-40 degen qujat bar. Ushaq kókke kóteriler aldynda ony tolyq kim óńdeý kerektigi sol qujatta reglamenttelgen.
«Biraq bizde ondai normativ joq», - dedi Kóliktegi oqiǵalar men intsidentterdi tekserý departamentiniń direktory.
Sarapshy qazirgi tańda jeke menshik áýe kompaniialary ekipaj múshelerin ushaqty jolǵa shyǵar kezde óńdeý boiynsha birqatar shekteýler qoiatynyn da atap ótti.
«Keibir jeke áýe kompaniialary bul turǵyda ekpiajǵa qatty shekteýler qoiatyn jaǵdailar bar. Óitkeni bul shara arzan emes. Bir ushaqty tolyq óńdeýge 15 myń eýroǵa deiin shyǵyn ketýi múmkin», - dedi maman.
Brifing barysynda Bolat Naýryzáliev tekserý qorytyndysy shyǵarylǵanymen, naqty kimniń kináli ekenin aitý avitsiiaǵa jaýapty organdardyń quzyretine kirmeitinin eskertti.
«Bizdiń beretin qorytyndymyz ben usynymdar boiynsha Azamattyq aviatsiianyń «Aviatsiia ákimshiligi» mekemesi sheshim qabyldaidy. Bul usynymdar Almaty túbindegi ushaq apaty siiaqty oqiǵalardyń qaitalanbaýy úshin beriledi. Olardyń tarapynan eskertýler bar. Úsh jyldan beri ol eskertýlerdegi kemshilikter joiylǵan joq. Ishki ister ministrligi, Kólik prokýratýrasy, Aviatsiia ákimshiligi, aviatsiialyq uiymdar osy máseleni qaraidy», - dedi ol.
